राष्ट्रीय स्वयंसेवक संघाचा मकरसंक्रमण उत्सव डोंबिवलीत आयोजित करण्यात आला आहे. या कार्यक्रमात सरसंघचालक मोहन भागवत स्वयंसेवकांना मार्गदर्शन करणार आहेत. गेल्या २० वर्षांनंतर प्रथमच अशा प्रकारचा उत्सव शहरात होत आहे. संघाच्या कल्याण जिल्ह्य़ातर्फे आयोजित हा कार्यक्रम १५ जानेवारी रोजी सकाळी साडेआठ वाजता घरडा सर्कलजवळील सावळाराम महाराज क्रीडासंकुलात होणार आहे. यावेळी डॉ. अनिल हेरुर, जिल्हा संघचालक मधुकर चक्रदेव उपस्थित राहणार आहेत. भिवंडी, टिटवाळा, अनगाव, कल्याण, डोंबिवली येथील सुमारे साडेचार हजार स्वयंसेवक या कार्यक्रमाला गणवेशात उपस्थिती लावणार आहेत, असे संयोजकांनी सांगितले. ध्वजारोहण, योग प्रात्यक्षिक, सांघिक गीतांचा कार्यक्रम यावेळी होणार आहे.