विनापरवाना देशी बनावटीचे रिव्हॉल्वर आणि गांजाची विक्री करण्यास आलेल्या तरुणास शहापूर पोलिसांनी मुंबई-नाशिक महामार्गावर आसनगाव येथे अटक केली. आसिफ गनी शेख असे या तरुणाचे नाव असून तो शहापूरजवळील कळंभे गावचा राहणारा आहे.
मुंबई-नाशिक महामार्गावर रिव्हॉल्वर विक्री आणि गांजा विक्रीसाठी एक व्यक्ती येणार असल्याची माहिती शहापूर पोलिसांना मिळाली होती. त्यामुळे पोलीस निरीक्षक सुनील वडके व त्यांच्या पथकाने परिसरात सापळा रचला होता. शनिवारी रात्री नऊच्या सुमारास आसिफ महामार्गावरच्या एका हॉटेलसमोर उभा होता, त्या वेळी पोलिसांनी त्यास अटक केली. त्याच्याकडे विविध मोबाइल कंपन्यांची सिमकार्ड्स पोलिसांना सापडली.