धुळे जिल्हा परिषदेचे तीन नवीन गट

जिल्हा परिषदेच्या गट रचनेत नगाव (ता. धुळे), नवापाडा (ता. साक्री) आणि पळासनेर (ता. शिरपूर) या नव्या गटांची निर्मिती झाली आहे. सुधारित लोकसंख्येनुसार नगरपंचायत अस्तित्वात आल्याने शिंदखेडा आणि वर्षी हे दोन गट रद्द झाले आहेत. नव्या रचनेनुसार आता ५६ पैकी २८ जागा महिलांसाठी आरक्षित झाल्या आहेत.
जिल्हाधिकारी प्रकाश महाजन, अपर जिल्हाधिकारी डॉ. अशोक करंजकर यांसह लोकप्रतिनिधींच्या उपस्थितीत जिल्हाधिकारी कार्यालयात गट रचना व आरक्षण सोडत काढण्यात आली. नगाव व नवापाडा हे दोन्ही नवे गट अनुसूचित जमातीच्या महिलांसाठी तर पळासनेर सर्वसाधारण प्रवर्गासाठी आरक्षित झाला आहे.
जिल्ह्य़ातील ५६ गटांचे जाहीर झालेले नवीन आरक्षण पुढीलप्रमाणे- लामकाणी, बोरकुंड, रतनपुरा, निमडाळे, बळसाणे, विखरण, बेटावद, नरडाणा, सांगवी व खलाणे (अनुसूचित जमाती महिला), छडवेलकोर्डे, कापडणे व कुसुंबा, बोराडी, बलकुवा, खर्दे  (सर्वसाधारण महिला), मोराणे प्र. ल., म्हसदी (अनुसूचित जाती महिला), बाळापूर (अनुसूचित जाती), सोनगीर, नेर, वलवाडी, फागणे, शिरुड. पिंपळगाव, साक्री, मालपूर, चिमठाणा, थाळनेर, कोडीद (अनुसूचित जमाती), वरखेडे, देऊरबुद्रुक, कासारे, धाडणे, पिंपळनेर, बाम्हणे, तऱ्हाडी  (सर्वसाधारण) जैताणे, निजामपूर, कुडाशी, मालपूर, विरदेल, मेथी, आंबे, दहिवद (नागरिकांचा मागास प्रवर्ग महिला), दहिवेल, चौपाळे, सामोडे, भरवाडे, वाघाडी, बभळाज (मागास प्रवर्ग) याप्रमाणे आरक्षण आहे.
जिल्हा परिषद गटांची रचना आणि आरक्षण जाहीर झाल्यानंतर विद्यमान बहुतेक सदस्यांना दुसऱ्या जागा शोधाव्या लागणार असल्याचे स्पष्ट झाले. यापूर्वीच्या ५५ गटात आणखी एकाची भर पडून गटांची संख्या ५६ झाली आहे.
२८ जागांवर महिला राज असेल. त्यानुसार अनुसूचित जमातीच्या २३ पैकी १२, अनुसूचित जातीच्या तीन पैकी दोन, नागरिकांच्या मागास प्रवर्गाच्या १५ पैकी आठ आणि सर्वसाधारण प्रवर्गातील १५ पैकी सहा जागांवर महिला आरक्षण निघाले आहे.