छत्रपती संभाजीनगर – भरधाव कारने ट्रकला पाठीमागून दिलेल्या धडकेत पती-पत्नीसह तिघांचा जागीच मृत्यू झाला. या भीषण अपघातात अन्य पाच जण जखमी झाले. वैजापूर तालुक्यातून गेलेल्या समृद्धी महामार्गावर शिवराई शिवारात शुक्रवारी सायंकाळी ही घटना घडली. वनसिंग धोंडीराम राठोड (४५), कमला वनसिंग राठोड (४०, रा .जांभळी तांडा ता. पैठण) व कुमारी योगेश जाधव (२२, रा. टाकळी तांडा ता. खुलताबाद) अशी मृतांची नावे आहेत.
हेही वाचा >>> जालना: चिमुकल्यास गळफास देऊन मातेची आत्महत्या; जाफराबाद तालुक्यील घटना
तर रामसिंग वनसिंग राठोड (३०), शीतल वनसिंग राठोड (२४), मयंक योगेश जाधव (२), नेहा वनसिंग राठोड (२२), योगेश सुभाष जाधव (२८), ,अशी गंभीर जखमींची नावे आहेत. टाकळी तांडा ता खुल्ताबाद येथील योगेश जाधव हे मुंबई पोलीस दलात कार्यरत आहेत. त्यांच्या कुटुंबियांनी वडगाळे नाशिक येथील देवाला नवस केला होता. त्यासाठी शुक्रवारी त्यांचे व सासुरवाडीचे कुटुंबीय असे आठ जण नाशिक येथे गेले होते. कंदुरीचा नवस फेडून ते सर्वजण समृद्धी महामार्गाने परतत असताना त्यांची कार मुंबईवरून नागपूरला माल वाहतूक करणाऱ्या ट्रकवर पाठीमागून धडकली. घटनेची माहीती मिळताच सहाय्यक पोलीस अधीक्षक महक स्वामी, पोलीस निरीक्षक श्यामसुंदर कौठाळे, महामार्गाचे सहाय्यक पोलीस निरीक्षक घुले आदींनी मदतकार्य केले.
