एचडीबी फायनान्शियलच्या ‘आयपीओ’त दुसऱ्या दिवशी भरणा पूर्ण

राष्ट्रीय शेअर बाजाराकडील माहितीनुसार, १२,५०० कोटी रुपयांच्या प्रारंभिक समभाग विक्रीसाठी उपलब्ध १३.०४ कोटी समभागांच्या तुलनेत १५.११ कोटी समभागांसाठी बोली लावण्यात आली. बिगर-संस्थात्मक गुंतवणूकदारांसाठी राखीव ठेवण्यात आलेल्या भागासाठी २.२९ पट अधिक भरणा झाला, तर पात्र संस्थात्मक खरेदीदारांसाठी राखीव हिस्सा ९० टक्के आणि किरकोळ वैयक्तिक गुंतवणूकदारांसाठी राखीव ठेवण्यात आलेला भागासाठी ६४ टक्के भरणा झाला आहे. या आधी सुकाणू गुंतवणूकदारांकडून कंपनीने ३,३६९ कोटी रुपयांचा निधी उभारला आहे. शुक्रवारी आयपीओसाठी अर्ज करण्यासाठी गुंतवणूकदारांना अखेरची संधी आहे.

‘एचडीबी’च्या आयपीओसाठी प्रति समभाग ७०० ते ७४० रुपयांचा किंमतपट्टा निश्चित करण्यात आला आहे. प्रवर्तक कंपनी एचडीएफसी बँक ऑफर फॉर सेलच्या माध्यमातून एचडीबीमधील १० हजार कोटी रुपये मूल्याचा भागहिश्शाची विक्री करणार आहे. या बँकेतर वित्तीय कंपनीमध्ये एचडीएफसी बँकेचा सध्या ९४.३६ टक्के हिस्सा आहे.

दक्षिण कोरियाची वाहन निर्माती कंपनी ह्युंदाईच्या २७,००० कोटी रुपयांच्या भागविक्रीनंतर एचडीबी फायनान्शियलने गेल्या तीन वर्षांतील दुसऱ्या सर्वात मोठ्या भागविक्रीला प्रस्तावित केले आहे.

आयपीओद्वारे उभारलेल्या निधीतून कंपनी भविष्यातील भांडवली गरजांच्या पूर्ततेसोबत अतिरिक्त कर्ज वितरण आणि व्यवसाय विस्तार करणार आहे. रिझर्व्ह बँकेने मोठ्या बँकेतर वित्तीय कंपन्यांना तीन वर्षांत सूचिबद्ध करण्याचे बंधन ऑक्टोबर २०२२ मध्ये घातले होते. त्यानुसार, एचडीबीने समभागांच्या सूचिबद्धतेचे हे पाऊल उचलले आहे. कंपनीचे समभाग मुंबई शेअर बाजार आणि राष्ट्रीय शेअर बाजारात २ जुलैला सूचिबद्ध होणे अपेक्षित आहे.