दिल्लीचा ‘ताप’ उतरला!

दिल्लीतील चार पोलिसांवर कारवाई करण्याच्या मागणीसाठी मुख्यमंत्री अरविंद केजरीवाल यांच्या नेतृत्वाखाली राज्य मंत्रिमंडळ आणि ‘आम आदमी’ पक्षाने सुरू केलेले आंदोलन मंगळवारी अचानक मागे घेतले. शहरातील काही मेट्रो स्थानके बंद पाडून, मोठी वाहतूक कोंडी निर्माण करून, कायदा व सुव्यवस्थेचा प्रश्न निर्माण करून आणि प्रजासत्ताक दिनाच्या कार्यक्रमांनाच अडचणीत आणल्यानंतर केजरीवाल यांनी नायब राज्यपालांनी दिलेल्या आश्वासनाच्या मोबदल्यात हे आंदोलन मागे घेतले.  
केजरीवाल यांच्या मंत्रिमंडळातील कायदामंत्री सोमनाथ भारती यांच्या मतदारसंघातील गैरव्यवहारांना पाठिशी घालणाऱ्या पोलिसांवर कारवाई करण्यास केंद्रीय गृहमंत्रालयाने नकार दिल्यानंतर हे धरणे आंदोलन सुरू झाले होते. या चार पोलिसांवर कारवाई व्हावी, यासाठी केजरीवाल आणि त्यांचे मंत्रिमंडळ सोमवारपासून दिल्लीतील रेल भवन येथे धरणे मांडून बसले होते. त्यांच्या जोडीला ‘आप’चे शेकडो कार्यकर्तेही जमा झाले. या आंदोलनामुळे दिल्लीतील मेट्रोवाहतूक मोठय़ा प्रमाणात विस्कळीत झाली होती. हे आंदोलन अन्यत्र हलवण्याची पोलिसांची विनंती केजरीवाल यांनी धुडकावली आणि राजघाटवरही आंदोलन करण्याचा इशारा दिला होता. या सगळय़ा घडामोडींमुळे प्रजासत्ताक दिनाच्या कार्यक्रमात अडथळे येण्याची चिन्हे निर्माण झाली होती. या पाश्र्वभूमीवर हे आंदोलन थांबवण्यासाठी केंद्र सरकारने तातडीने हालचाली सुरू केल्या. त्यानुसार, केजरीवालांनी मागणी केलेल्या चारपैकी दोन पोलिसांना ‘सक्तीच्या रजेवर’ पाठवण्यात आले. तसेच पोलिसांच्या जबाबदाऱ्या निश्चित करण्याबाबत आश्वासनही त्यांना देण्यात आले. त्यानंतर सायंकाळी केजरीवाल यांनी आंदोलन मागे घेतल्याचे जाहीर केले.