लोकसभेच्या निवडणुका जाहीर होताच पंतप्रधान नरेंद्र मोदींचं मोठं वक्तव्य, म्हणाले, “मी तर…”

मी तर २०४७ ची तयारी करतोय

पंतप्रधान नरेंद्र मोदी आज (१६ मार्च) इंडिया टुडेच्या कॉन्क्लेव्हमध्ये सहभागी झाले होते. यावेळी पंतप्रधान नरेंद्र मोदी यांनी सुरुवातीलाच आगामी निवडणुकीबाबत भाकीत केलं. पंतप्रधान नरेंद्र मोदी म्हणाले, “मोदी काय आहेत हे शोधण्यासाठी तुमची संपूर्ण टीम लावा. त्यांना ते शोधून काढू द्या. तुम्ही २०२९ ला अडकलात, मी तर २०४७ ची तयारी करत आहे”, असं म्हणत पंतप्रधान नरेंद्र मोदी यांनी २०२४ नंतरच्या निवडणुकांबाबतही सकारात्मक भाष्य करून तेच पुढेही भाजपाचंच सरकार सत्तेत राहणार असल्याचं सूचक वक्तव्य केलं आहे. आजच लोकसभेच्या निवडणुका लागलेल्या असताना त्यांचं हे विधान महत्त्वाचं आहे.

हेही वाचा >> Lok Sabha Elections 2024 : ५४३ जागा असताना ५४४ जागांसाठी निवडणूक जाहीर, एक मतदारसंघ वाढला? नेमकं गणित काय?

देशांत स्टार्टअप्स कंपन्या वाढल्या

“जेव्हा मी अशा कॉन्क्लेव्हला जातो तेव्हा माझ्याकडून हेडलाइन्सची अपेक्षा केली जाते. पण मी डेडलाइनवर काम करणारा व्यक्ती आहे, हेडलाईनवर नाही”, असा टोलाही मोदींनी लगावला. देशातील स्टार्टअप्सच्या संख्येत लक्षणीय वाढ झाल्याचेही पंतप्रधान मोदींनी सांगितले. “१० वर्षांपूर्वी जवळपास १०० स्टार्टअप्स होते. आता १.२५ लाख स्टार्टअप्स नोंदणीकृत आहेत. भारतातील स्टार्टअप ६०० हून अधिक जिल्ह्यांमध्ये आहेत, ज्यात देशाच्या क्षेत्रफळाचा ९० टक्के वाटा आहे,” पंतप्रधान मोदी म्हणाले.

हेही वाचा >> Lok Sabha Elections 2024 : लोकसभा निवडणुकीचं बिगुल वाजलं, EC कडून सात टप्प्यांतील कार्यक्रम जाहीर; महाराष्ट्रात केव्हा होणार मतदान?

मी सर्वाधिकवेळा ईशान्येकडील राज्यांत दौरा केलाय

२०१४ पासून त्यांच्या मंत्रिमंडळातील मंत्र्यांनी ६८० वेळा ईशान्येकडील राज्यांना भेटी दिल्या आहेत, असेही पंतप्रधान मोदी म्हणाले. ते म्हणाले, “मी, पंतप्रधान म्हणून देशाच्या इतर सर्व पंतप्रधानांनी केलेल्या एकत्रित दौऱ्यांपेक्षा ईशान्येकडील राज्यांना जास्त भेटी दिल्या आहेत.”