Greater Noida : संतापजनक! हुंड्यासाठी पतीने पत्नीला जिवंत जाळलं, घटनेनंतर मोठी खळबळ, पोलिसांनी पतीला ठोकल्या बेड्या

या महिलेला तिच्या पती आणि सासरच्यांनीही मारहाण केल्याचा आरोप करण्यात आला आहे. तसेच याच महिलेची मोठी बहीणही त्याच कुटुंबात विवाहित असून तिने आरोप केला आहे की, त्या दोघींनाही हुंड्यासाठी छळलं जात होतं आणि सासरच्या कुटुंबीयांनी ३६ लाख रुपये मागितले होते असा आरोप केला आहे. या घटनेबाबतचा एक व्हिडीओ व्हायरल झाला आहे. या संदर्भातील वृत्त एनडीटीव्हीने दिलं आहे.

मृत महिलेच्या बहिणीने म्हटलं की, “आमचा दोघींचाही छळ होत होता. आमच्या सासरचे लोक आम्हाला सांगायचे की ३६ लाख रुपये घेऊन या. गुरुवारी पहाटे १.३० ते ४ च्या दरम्यान माझ्यावरही हल्ला झाला. त्यांनी मला सांगितलं की, आम्हाला एका बहिणीसाठी हुंडा मिळाला, पण दुसऱ्याचं काय? आपण पुन्हा लग्न करू, मला अनेक वेळा मारहाण झाली आणि मी दिवसभर शुद्धीवर नव्हते”, असा आरोप तिने केला आहे.

मृत महिलेच्या बहिणीने पुढे म्हटलं की, “त्याच संध्याकाळी माझ्या मुलांसमोर माझ्या बहिणीवर क्रूरपणे हल्ला केला. माझ्या डोळ्यांसमोर तिला जाळून टाकलं. मी तिला वाचवण्याचा प्रयत्न केला, पण मी काहीही करू शकले नाही. कोणीतरी तिला रुग्णालयात दाखल केलं. मी ते पाहून बेशुद्ध पडले होते. मला न्याय हवा आहे. माझ्या सासरच्यांनी माझ्या बहिणीला ज्या प्रकारे त्रास दिला तसाच त्रास त्यांना द्यावा अशी माझी इच्छा आहे”, असं ती म्हणाली.

दरम्यान, ग्रेटर नोएडातील एका वरिष्ठ पोलीस अधिकाऱ्याने सांगितलं की, “गुरुवारी रात्री एका रुग्णालयातून माहिती मिळाली की एका महिलेला जळालेल्या अवस्थेत दाखल करण्यात आलं होतं. त्यानंतर तिला दिल्लीतील एका रुग्णालयात उपचारासाठी दाखल करण्यात येत होतं. मात्र, दुसऱ्या रुग्णालयात नेत असतानाच महिलेचा मृत्यू झाला. त्यानंतर तिच्या बहिणीच्या तक्रारीवरून गुन्हा दाखल करण्यात आला आहे. तसेच पती विपिनला अटक करण्यात आली आहे.”