World Cup 2019 : आंतरराष्ट्रीय क्रिकेटमध्ये भारताचा डंका; गब्बर, हिटमॅनने रचला नवा विक्रम

२०१३ पासून ICC ने आयोजित केलेल्या स्पर्धांमध्ये शिखर धवन आणि रोहित शर्मा यांनी सर्वाधिक १० अर्धशतके झळकावली. दोघांनीही २० डावांमध्ये हा पराक्रम केला आणि नवा विक्रम रचला. ऑस्ट्रेलियाविरुद्धच्या सामन्यात या दोघांनी हा पराक्रम करून दाखवला. टीम इंडियाचा ‘गब्बर’ फलंदाज शिखर धवन याने दमदार खेळी करत अर्धशतक ठोकले. त्याने ५३ चेंडूत ही मजल मारली. तर रोहित शर्माने ५७ धावा केल्या. त्याने ७० चेंडूत ३ चौकार आणि १ षटकार खेचले. पण कुल्टर-नाईलच्या गोलंदाजीवर तो बाद झाला.

Most 50+ scores in ICC ODI tournaments since 2013:
10 Dhawan in 20 inns
10 Rohit in 20 inns#IndvAus #CWC19

— Bharath Seervi (@SeerviBharath) June 9, 2019

दरम्यान, सामन्यात भारताचा कर्णधार विराट कोहली याने नाणेफेक जिंकून प्रथम फलंदाजीचा निर्णय घेतला. या सामन्यासाठी भारत आणि ऑस्ट्रेलिया या दोघांच्याही संघात कोणताही बदल करण्यात आलेला नाही. दोन्ही संघांनी आपला गेल्या सामन्यातील विजयी संघ कायम ठेवला. विश्वचषकात भारतावर अधिराज्य गाजवणारा ऑस्ट्रेलिया संघ सध्या डळमळीत अवस्थेत असला तरी विराट कोहलीच्या नेतृत्वाखालील भारताला रविवारी केनिंग्टन ओव्हल मैदानावर होणाऱ्या सत्त्वपरीक्षेला सामोरे जावे लागणार आहे. जवळपास वर्षभर संघर्ष करणाऱ्या ऑस्ट्रेलियाने स्टीव्ह स्मिथ आणि डेव्हिड वॉर्नर यांच्या पुनरागमनानंतर  गेल्या काही महिन्यांत आपली कामगिरी उंचावली आहे. विश्वचषक स्पर्धेतही अफगाणिस्तान आणि विंडीजविरुद्धचे सामने जिंकत ऑस्ट्रेलियाने आपण सहाव्यांदा विश्वचषक उंचावण्यासाठी सज्ज असल्याचे दाखवून दिले आहे.