Modi-Trump Phone Call: पंतप्रधान मोदी-ट्रम्प यांच्यात फोनवर चर्चा; बेकायदा स्थलांतरितांच्या मुद्द्यावर ट्रम्प काय म्हणाले?

पंतप्रधान नरेंद्र मोदी यांनी याबाबतची माहिती एक्सवर पोस्ट करून दिली आहे. “माझे मित्र राष्ट्राध्यक्ष डोनाल्ड ट्रम्प यांच्याशी बोलून आनंद वाटला. अध्यक्षपदी दुसऱ्यांदा निवडून आल्याबद्दल त्यांचे अभिनंदन केले. द्वीपक्षीय संबंधातून दोन्ही देशांचा फायदा आणि विश्वासार्ह भागीदारीसाठी आम्ही कटिबद्ध आहोत. आमच्या लोकांचे कल्याण, जागतिक शांतता, समृद्धी आणि सुरक्षेसाठी आम्ही एकत्र काम करू, असा विश्वास व्यक्त केला”, असे पंतप्रधान मोदींनी एक्स पोस्टमध्ये म्हटले आहे.

इंडो-पॅसिफिक, मध्य पूर्व आणि युरोपमधील सुरक्षा यासारख्या काही प्रमुख प्रादेशिक समस्यांवरही उभय नेत्यांमध्ये चर्चा झाल्याचे रॉयटर्सने म्हटले आहे. भारताने अमेरिकन बनावटीच्या संरक्षण उपकरणांची खरेदी वाढवावी आणि अधिक संतुलित व्यापार संबंध वाढविण्याकडे वाटचाल करावी, असेही ट्रम्प यांनी सांगितले.

मोदी आणि ट्रम्प यांची मैत्री

पंतप्रधान मोदी आणि डोनाल्ड ट्रम्प यांच्यात पहिल्या टर्मपासून मैत्रीपूर्ण संबंध आहेत. ट्रम्प यांच्या अध्यक्षपदाच्या पहिल्या कार्यकाळात शेवटचा विदेश दौरा भारतात केला होता. सप्टेंबर २०१९ मध्ये उभय नेत्यांनी होस्टन आणि फेब्रुवारी २०२० मध्ये अहमदाबाद येथे जाहीर सभेला संबोधित केले होते. ट्रम्प हे दुसऱ्यांदा अध्यक्षपदी निवडून आल्यानंतर त्यांनी स्थलांतरितांबाबत घेतलेल्या भूमिकेवरून भारताने चिंता व्यक्त केली आहे. त्या पार्श्वभूमीवर सोमवारी दोन्ही नेत्यांमध्ये झालेली चर्चा महत्त्वाची मानली जाते.