Let Terrorist Attacked in Pakistan : पाकिस्तानमधील लष्कर-ए-तैयबा या दहशतवादी संघटनेचा सह-संस्थापक व कमांडर आमिर हमजा एका हल्ल्यात गंभीर जखमी झाल्याचं वृत्त समोर आलं आहे. त्यानंतर उपचारांसाठी त्याला लाहोरमधील पाकिस्तानी लष्कराच्या रुग्णालयात दाखल करण्यात आलं आहे. पाकिस्तानमधील दहशतवाद्यांनी काश्मीरमधील पहलगाममध्ये पर्यटकांवर केलेल्या हल्ल्यानंतर भारताने दहशतवाद्यांविरोधात मोहीम सुरू केली आहे. ‘ऑपरेशन सिंदूर’च्या माध्यमातून भारतीय लष्कराने १०० हून अधिक दहशतवाद्यांना कंठस्नान घातलं आहे. अशातच अज्ञातांच्या हल्ल्यात लष्कर-ए-तैयबाचा कमांडर जखमी झाल्याची बातमी समोर आली आहे.
आमिर हमजा हा लष्कर-ए-तैयबाचं मुखपत्र देखील चालवतो. हमजा मंगळवारी त्याच्या घरी होता. त्यानंतर अचानक आयएसआयने त्याला लाहोरमधील पाकिस्तानी लष्कराच्या रुग्णालयात दाखल केलं. तीन दिवसांपूर्वी लष्करमधील कुख्यात दहशतवादी अबू सैफुल्लाहवर पाकिस्तानमध्ये काही अज्ञातांनी गोळीबार केला होता. या गोळीबारात तो जागीच ठार झाला. त्यानंतर आता लष्करच्या सह-संस्थापकाला गंभीररित्या जखमी अवस्थेत रुग्णालयात दाखल करण्यात आलं आहे. टाइम्स ऑफ इंडियाने याबाबतचं वृत्त प्रसिद्ध केलं आहे.
आमिर हमजा कोण आहे?
ऑगस्ट २०१२ मध्ये अमेरिकेने हमजा याला जागतिक दहशतवादी घोषित केलं होतं. तो मूळचा पाकिस्तानच्या पंजाब प्रांतातील गुजरांवालाचा रहिवासी आहे. तो कुख्यात दहशतवादी हाफिज सईद व अब्दुल्ल रहमान मक्की यांचा निकटवर्तीय आहे. २००० च्या दशकात हमजा भारतविरोधातील दहशतवादी कारवायांमध्ये सक्रीय होता. २००५ साली बंगळुरूमधील इंडियन इन्स्टिट्युट ऑफ सायन्सवर झालेल्या दहशतवादी हल्ल्याच्या कटात हमजा सहभागी होता.
‘लष्कर’चा कमांडर अबू सैफुल्लाहचा खात्मा
दरम्यान, लष्कर-ए-तैयबाचा टॉप कमांडर अबू सैफुल्लाह याचा खात्मा करण्यात आला आहे. तीन दिवसांपूर्वी पाकिस्तानच्या सिंध प्रांतात या मोस्ट वाँटेड दहशतवाद्यावर काही अज्ञातांनी हल्ला केला होता. या हल्ल्यात तो जागीच ठार झाला. सैफुल्लाह हा भारतातील तीन मोठ्या दहशतवादी हल्ल्यांचा सूत्रधार होता. सैफुल्लाह हा १८ मे रोजी दुपारी त्याच्या घरातून बाहेर पडला. तो एका क्रॉसिंगजवळ दाखल होताच काही अज्ञात हल्लेखोरांनी त्याच्यावर गोळीबार केला.
२००१ मध्ये रामपूर येथील सीआरपीएफच्या छावणीवर झालेला दहशतवादी हल्ला, २००५ मध्ये बंगळुरू येथील इंडियन सायन्स काँग्रेसवर झालेला हल्ला आणि २००६ मध्ये नागपूर येथील राष्ट्रीय स्वयंसेवक संघाच्या मुख्यालयावरील हल्ला अशा तीन हल्ल्यांचा कट सैफुल्लाहनेच शिजवला होता.
