पीटीआय, कासरगोड मोबाइल फोनचे व्यसन लागलेल्या मुलाला रागावल्यामुळे, मुलाने आईवरच प्राणघातक हल्ला केल्याची घटना केरळमध्ये घडली. यात गंभीर जखमी झालेली आई शनिवारी कन्नूर जिल्ह्यातील एका रुग्णालयात मरण पावली. कन्नूर जिल्ह्यातील केणिच्चिरा येथील सुजित नावाच्या तरुणाने गेल्या आठवडय़ात त्याची आई रुक्मिणी हिचे डोके घरातील भिंतीवर आपटल्यामुळे ती गंभीर जखमी झाली. तिच्यावर आठवडाभर रुग्णालयात उपचार सुरू होते. आरोपी सुजितला या गुन्ह्यानंतर लगेच अटक करण्यात आली होती. चौकशीदरम्यान सुजितने त्याच्या गुन्ह्याची कबुली दिली. सतत मोबाइल फोन वापरत असल्याबद्दल आईने रागावल्यामुळे आपण तिच्यावर हल्ला केला, असे त्याने सांगितले.
