तामिळनाडूमध्ये करोना औषधाच्या नावाखाली विषाच्या गोळ्या दिल्याचा प्रकार समोर आला असून, त्यामध्ये तीन जणांचा मृत्यू झाला आहे. तर एकाची प्रकृती चिंताजनक आहे. ही घटना कर्ज घेतलेल्या पैशांशी संबंधित आहेत. विषबाधा झालेल्या कुटुंबाने एका व्यक्तीला कर्ज दिले होते. जेव्हा कुटुंबाने पैशाची मागणी केली. तेव्हा त्याने हे कृत्य केले. मिळालेल्या माहितीनुसार, ही घटना तामिळनाडूच्या इरोड येथे घडली.

इरोडमध्ये करुप्पनकाउंडर (७२ वर्षे) यांनी काही महिन्यांपूर्वी आर कल्याणसुंदरम नावाच्या व्यक्तीला १५ लाख रुपये दिले होते. करुप्पनकाउंडर यांनी गरज असल्यामुळे कल्याणसुंदरमकडे पैसे परत मागितले. पैशांची परतफेड करु न शकल्यामुळे कल्याणसुंदरम यांनी करुप्पनकाउंडर आणि त्याच्या कुटुंबाला संपवण्याचा कट रचला.

बनावट आरोग्य कर्मचारी बनवून पाठवले घरी 

कल्याणसुंदरम यांनी सबरी नावाच्या व्यक्तीसमवेत योजना आखली. यात साबरी यांना आरोग्य विभागाचा कर्मचारी बनवून करुप्पनकाउंडर यांच्या घरी पाठविण्यात आले. २६ जूनला तिथे जाऊन सबरीने करुप्पनकाऊंडरला विचारले की कुटुंबातील कोणालाही खोकला, सर्दी इ. आहे का? यानंतर सबरीने जाताजाता काही विषाच्या गोळ्या करुप्पनकाऊंडरकडे दिल्या. यावेळी सबरीने रोग प्रतिकारशक्ती वाढविण्यासाठी हे औषध असल्याचे सांगितले.

हेही वाचा- २० हजार वर्षांपूर्वीही आलेली करोनाची साथ; संशोधनामधून समोर आली थक्क करणारी माहिती

करुप्पनकाऊंडरची प्रकृती गंभीर

सबरी गेल्यानंतर करुप्पनकाऊंडर, त्यांची पत्नी, मुलगी आणि घरात काम करणाऱ्या मोलकरीने त्या गोळ्या घेतल्या. त्यानंतर ते चौघेही बेहोश झाले. शेजार्‍यांनी लवकरच त्याला दवाखान्यात नेले. करुप्पनकाऊंडरची पत्नी मल्लिका, मुलगी दीपा आणि मोलकरीन कुप्पल यांचा रुग्णालयात मृत्यू झाला. सध्या, करुप्पनकाऊंडरची प्रकृती देखील गंभीर आहे.

रविवारी रात्री आरोपी कल्याणसुंदरम आणि साबरी यांना अटक करण्यात आली. दोघांनाही आता १५ दिवसांच्या न्यायालयीन कोठडीत पाठविण्यात आले आहे.