IPS Officer DIG Harcharan Singh Bhulllar: केंद्रीय अन्वेषण विभागाने (CBI) गुरुवारी लाचखोरीच्या प्रकरणात पंजाब पोलीस दलातील रोपर रेंजचे डेप्युटी इन्स्पेक्टर जनरल (DIG) हरचरण सिंग भुल्लर यांना अटक केली. त्यांना कथितपणे आठ लाख रुपयांची लाच स्वीकारताना रंगेहाथ पकडले होते, त्यानंतर या प्रकरणाची चौकशी सुरू झाली. त्यानंतर भुल्लर यांच्याशी संबंधित ठिकाणांवर छापेमारी केल्यानंतर सीबीआयच्या हाती मोठं घबाड लागलं आहे. याबाबत सीबीआयने गुरूवारी रात्री एक निवेदन दिले आहे.
सीबीआय अधिकाऱ्यांनी सांगितले की, ५ कोटी रुपयांची रोकड, दीड किलो सोन्याची दागिने, २२ लग्झरी घड्याळे, ऑडी आणि मर्सिडिझ सारख्या आलिशान गाड्या, ४० लीटर उंची मद्याच्या बाटल्या, एक पिस्तूल, एक रिव्हॉलवर आणि एक डबल बॅरल बंदूक, तसेच दारूगोळ्यासह एक एअरगन जप्त करण्यात आली आहे.
भंगार व्यापाराकडून मागितली ८ लाखांची लाच
डीआयजी भुल्लर २००७ च्या बॅचचे आयपीएस अधिकारी आहेत. भुल्लर यांचे वडील महल सिंग भुल्लर पंजाबचे डीजीपी होते. भुल्लर यांच्या विरोधात एका भंगार व्यापाऱ्याने तक्रार दाखल केली होती. भंगार व्यापाऱ्याच्या विरोधात २०२३ साली दाखल झालेल्या एका एफआयआर संदर्भात भुल्लर यांनी लाच मागितली होती.
सीबीआय अधिकाऱ्यांनी चंदीगडच्या सेक्टर ४० मधील भुल्लर यांच्या निवासस्थानी छापेमारी केली. अटकेनंतर भुल्लर यांना चंदीगडच्या सीबीआय कार्यालयात आणले गेले. याचबरोबर किरशानू नामक एक मध्यस्थालाही अटक करण्यात आली. त्याच्याकडून २१ लाख रुपयांची रोकड जप्त करण्यात आली.
सीबीआयने दिलेल्या माहितीनुसार, दोन्ही आरोपींना शुक्रवारी न्यायालयात सादर केले जाणार आहे. सीबीआयने दाखल केलेल्या एफआयआरनुसार तक्रारकर्त्यांनी आरोप केला की, भुल्लर यांनी मासिक हप्ता दिला जावा, अशी मागणी केली होती. ज्याला त्यांनी सेवा-पाणी असे नाव दिले होते. जर महिन्याला विशिष्ट रक्कम दिली नाही तर व्यापार संबंधित गुन्ह्यात फसविण्याची धमकी भुल्लर यांनी दिली होती.
भुल्लर यांनी मध्यस्थाच्या माध्यमातून भंगार व्यापाऱ्याकडून एफआयआर रद्द करण्यासाठी ८ लाख रुपयांची लाच मागितली गेली.
