राजस्थानमधील उदयपूरमध्ये करोनाची लस देण्याच्या नावाखाली फसवणूक केल्याची खळबळजनक घटना समोर आली आहे. उदयपूरमध्ये एका व्यक्तीने दुसऱ्या व्यक्तीला लस देण्याचे सांगून त्याची नसबंदी करून घेतल्याचा धक्कादायक प्रकार घडला आहे.. हा प्रकार पीडित व्यक्तीला समजताच त्याने भूपालपुरा पोलीस ठाण्यात गुन्हा दाखल करून न्याय मिळवून देण्याची मागणी केली आहे. त्यानंतर या प्रकरणाचा तपास उपअधीक्षकांकडे सोपवण्यात आला आहे.
माध्यमांच्या वृत्तानुसार, भूपालपुरा पोलीस स्टेशनचे अधिकारी भवानी सिंह यांनी सांगितले की, उदयपूरच्या प्रतापनगर भागात असलेल्या गुरुद्वाराजवळ राहणारा कैलाशपुत्र बाबुलाल गमेती हा २९ डिसेंबरला सकाळी पोलीस स्टेशन हद्दीतील बेकनी पुलियाजवळ मजुरीच्या कामासाठी उभा होता. यादरम्यान सेक्टर पाच मध्ये राहणारा नरेश चव्हाट हा त्याच्याकडे आला. करोनाची लस घेण्यासाठी २००० रुपये मिळतील, असे सांगून नरेशने कैलासला आपल्या जाळ्यात अडकवले.
यानंतर त्याने कैलाशपुत्रला स्कूटीवर बसवून पुला येथील रुग्णालयात नेले आणि तिथे त्याला इंजेक्शन दिले. यामुळे तो बेशुद्ध झाला आणि त्याच्या नसबंदीची शस्त्रक्रिया करण्यात आली. शस्त्रक्रियेनंतर नरेश कैलासला बहिणीच्या घरी सोडून ११०० रुपये देऊन पळून गेला. ही बाब कैलासला कळताच तो आणि त्याचे कुटुंबीय खूपच अस्वस्थ झाले. त्याचवेळी आरोपींवर कारवाईची मागणी करत त्यांनी भूपालपुरा पोलीस ठाणे गाठून गुन्हा दाखल केला.
पीडित कैलाशच्या आईने दाखल केलेल्या तक्रारीत तो तिचा एकुलता एक मुलगा असून, विवाहित आहे, पण त्याला मूलबाळ नसल्याचे म्हटले आहे. आता तिला तिच्या नातवाचा चेहरा कसा दिसणार? त्यामुळे तिची काळजी वाढली आहे. पोलिसांनी फसवणूक आणि एससी एसटी कायद्यांतर्गत गुन्हा दाखल करून तपास सुरू केला आहे.
दरम्यान, करोनाच्या उत्परिवर्तित ओमायक्रॉन या विषाणूचा वेगाने प्रसार सुरू असल्याच्या पार्श्वभूमीवर देशात १५ ते १८ वर्षे वयोगटातील मुलांचे लसीकरण आजपासून सुरू होत आहे. मुलांच्या लसीकरणासाठी कोव्हॅक्सिन ही लस वापरण्यात येणार असून, महाराष्ट्रातील ६५० केंद्रांवर सुमारे साठ लाख मुलांचे लसीकरण करण्यात येणार आहे.
