जेटली, स्वराज आणि उमा भारती नव्या केंद्रीय मंत्रिमंडळात नाहीत

माजी अर्थमंत्री अरूण जेटली यांच्याप्रमाणेच माजी परराष्ट्र मंत्री सुषमा स्वराज यांनी प्रकृतीचे कारण देत निवडणूक लढवण्यास नकार दिला होता. त्यामुळे त्यांचीही कोणत्याच मंत्रिपदी वर्णी लागलेली नाही. मागील सरकारच्या काळात म्हणजेच २०१४ ते २०१९ या काळात सुषमा स्वराज यांनी एक सक्षम परराष्ट्र मंत्री म्हणून काम केले. त्या ट्विटरवरही अॅक्टिव्ह होत्या. त्यांच्या समोर आलेली समस्या त्या अत्यंत खुबीने आणि कुशलतेने सोडवत. मात्र गेल्या काही दिवसांपासून त्यांना प्रकृतीने साथ दिली नाही. त्याचमुळे त्या मंत्रिमंडळात नाहीत. उमा भारती यांनाही केंद्रीय मंत्रिमंडळात स्थान देण्यात आलेले नाही. गंगा स्वच्छता अभियानाचा स्वतंत्र कार्यभार त्यांना देण्यात आला होता. मात्र यावेळी त्यांना मंत्री म्हणून शपथ देण्यात आलेली नाही.

मागच्या वेळी म्हणजेच २०१४ मध्ये जेव्हा मोदी सरकारचा शपथविधी सोहळा झाला त्यावेळी गोपीनाथ मुंडे यांना केंद्रीय मंत्रीपद देण्यात आले होते. मात्र गोपीनाथ मुंडे यांचे अपघाती निधन झाले. तसेच मनोहर पर्रिकर यांनाही केंद्रीय मंत्रीपद देण्यात आले होते, त्यानंतर त्यांना गोव्यात मुख्यमंत्री म्हणून पाठवण्यात आले. मात्र कर्करोगामुळे त्यांचेही निधन झाले. आता नव्या मंत्रिमंडळात मागच्या मंत्रिमंडळातले अरूण जेटली, सुषमा स्वराज आणि उमा भारती हे चेहरे दिसणार नाहीत. भाजपाचे राष्ट्रीय अध्यक्ष अमित शाह यांचा समावेश मोदी सरकारच्या केंद्रीय मंत्रिमंडळात करण्यात आला आहे. त्यांना कोणतं खातं दिलं जाणार? याची चर्चा राजकीय वर्तुळात रंगली आहे. तसेच अमित शाह केंद्रीय मंत्री झाल्याने त्यांना राष्ट्रीय अध्यक्षपद सोडावं लागणार आहे. त्यामुळे या पदावर कुणाची वर्णी लागणार हे पहाणेही महत्त्वाचे ठरणार आहे.