रशियामधील एका अब्जाधिशाच्या मालकीची 'फी' नावाची सुपरयाट म्हणजेच मोठी आलिशान बोट मंगळवारी लंडनमध्ये जप्त केली. युक्रेनमध्ये सुरु असणाऱ्या युद्धाच्या पार्श्वभूमीवर ब्रिटन सरकारने प्रतिबंधांअंतर्गत ही सुपरयाट्स जप्त करण्याचा सपाटा ब्रिटीश सरकारने सुरु केलाय. त्यामध्ये 'फी' हे पहिलं जहाज ठरलं आहे. विशेष म्हणजे लंडन सोडण्याच्या तयारीत असलेलं हे जहाज बंदर सोडण्याच्या अगदी काही तास आधी त्यावर जप्तीची कारवाई करण्यात आल्याचं रॉयटर्सने दिलेल्या वृत्तात म्हटलंय. राष्ट्रीय गुन्हेगारी संस्था (एनसीए) च्या नव्या 'कॉम्बॅक्टींग क्लेप्टोक्रेसी सेल'च्या अधिकाऱ्यांनी दिलेल्या माहितीनुसार कॅनेरी वार्फ येथे उभ्या असणाऱ्या तीन कोटी ८० लाख रुपये किंमत असणारी बोट जप्त करण्यासंदर्भातील नोटीसही मालकांना पाठवण्यात आलीय. एजन्सीने दिलेल्या माहितीनुसार, गुप्तचर यंत्रणांनी वेगाने यासंदर्भात काम करुन जहाजाचा मालक कोण आहे हे शोधून काढलं आणि त्यावर निर्बंध लादण्यासंदर्भातील कारवाई करता येईल असं सांगितल्याने हा जप्तीचा निर्णय घेण्यात आला. ब्रिटनचे परिवहन मंत्री ग्रांट शाप्स यांनी दिलेल्या माहितीनुसार, "आज आम्ही या सुपरयाटचा ताबा घेतलाय. आम्ही रशियाचे राष्ट्राध्यक्ष पुतिन यांच्यासोबत त्यांच्या साथीदारांना थेट कारवाईच्या माध्यमातून संकेत दिलेत," असं म्हटलं आहे. शाप्स यांनी या कारवाईच्या माध्यमातून आम्ही पुन्हा एकदा रशियाशी संबंधित लोकांवर कठोर कारवाई करु शकतो हे दाखवून दिल्याचं म्हटलंय. "रशियाशी संबंध असणाऱ्या व्यक्ती सत्तेचा फायदा घेत असतील तर त्यांच्याविरोधात आम्ही कठोर कारवाई करु शकतो हे यातून दाखवून दिलंय. या पुढेही आम्ही अशा कारवाया करत राहणार," असं शाप्स म्हणाले आहेत. 'फी' हे प्रसिद्ध जहाज निर्मिती कंपनी असणाऱ्या रॉय ह्यूसमॅनची निर्मिती आहे. हे या कंपनीचं तिसरं सर्वात मोठं जहाज आहे. हे जहाज म्हणजे, 'अमर्याद दारुचं कोठार' आहे असं कंपनीने म्हटलं होतं. तसेच या जहाजावरील स्विमिंग पूलचं पेटंटही काढण्यात आल्याचं कंपनीने म्हटलेलं. एनसीएचे अॅण्डी डिवाइन यांनी, "आजची कारवाई आम्ही किती वेगाने काम करु शकतो हे दाखवणारी होती. एनसीएन संक्षयास्पद मालमत्तेविरोधात वेगाने कारवाई करण्यात महत्वाची भूमिका बजावत आहे," असं स्पष्ट केलं. संस्थेने मुद्दाम मालकाचं नाव लपवण्यात आल्याचं म्हटलं आहे. असं केल्याने त्याच्याशी संबंधित इतर व्यक्ती सक्रीय होणार नाहीत याची काळजी यंत्रणेकडून घेण्यात आलीय. रशियन सरकारशी संबंधित अधिकारी, व्यापारी, श्रीमंत व्यक्तींच्या संपत्ती जप्त करुन त्यांच्यावर निर्बंध लादण्याचं काम सुरु राहील असं ब्रिटनकडून सांगण्यात आलंय.
