बंगळुरूत महिलेवर सामूहिक बलात्कार

बंगळुरू येथील कब्बन पार्क भागात बुधवारी रात्री प्रशिक्षणासाठी नोंदणी करण्यासाठी आलेल्या महिलेवर कर्नाटक राज्य लॉन टेनिस संघटनेच्या कार्यालयानजीक सामूहिक बलात्कार करण्यात आला. ही महिला तिशीतली असून लॉन टेनिस प्रशिक्षण संस्थेत नोंदणीसाठी शेजारच्या तुमकूर जिल्ह्य़ातून बंगळुरूत आली होती. पोलिस आयुक्त संदीप पाटील यांनी सांगितले, की ती बुधवारी तुमकूर येथून टेनिस प्रशिक्षण नोंदणीसाठी आली होती पण क्लब बंद असल्याने तिला दुसऱ्या दिवशी येण्यास सांगितले गेले.
रात्री नऊच्या सुमारास फलोद्यान विभागात काम करणाऱ्या दोन सुरक्षा रक्षकांनी तिला पाहिले व तिच्याशी बोलण्याचा प्रयत्न केला. आम्ही तुला मदत करू,असे त्यांनी तिला सांगितले. चालत असताना ते सिद्धिलगय्या पार्क येथे आले व तेथे त्यांनी तिच्यावर सामूहिक बलात्कार करून रस्त्याच्या कडेला टाकून दिले. पीडित महिलेने दिलेल्या माहितीनुसार टेनिस असोसिएशनच्या दोन सुरक्षा रक्षकांना बलात्काराच्या आरोपाखाली अटक करण्यात आली.