अजित पवारांची संपत्ती किती? पत्नी सुनेत्रा पवारांच्या नावे २८ कोटींची प्रॉपर्टी, ६१ लाखाचे दागिने तर स्वतःकडे…

२०१९ च्या निवडणूक प्रतिज्ञापत्रात अजित पवार यांनी जाहीर केलेल्या माहितीनुसार, पवार यांच्या नावे तब्बल २७ कोटीहून अधिक किमतीची मालमत्ता आहे. तर पवारांच्या पत्नी सुनेत्रा पवार यांच्या नावे ४७ कोटींहून अधिक रकमेची मालमत्ता आहे. स्थावर मालमत्तेमध्ये पवारांकडे पुण्यातील २० ठिकाणच्या जमिनी, चार निवासी इमारती व एक कर्मशियल इमारत आहे. तर पत्नी सुनेत्रा पवार यांच्या नावे ६ शेतजमिनी, २९ भूखंड व तीन निवासी इमारती आहेत.

जंगम मालमत्तेच्या रूपात सुनेत्रा पवार ६१ लाखाचे दागिने, एक ट्रॉली, एक इनोव्हा कार व एक ट्रॅक्टर आहे तर अजित पवार यांच्या नावे दोन ट्रॅक्टर, चार ट्रेलर व १३ लाखाहून अधिक किमतीच्या सोन्या- चांदीच्या वस्तू आहेत. अजित पवार यांच्याकडे असलेल्या गाड्यांची एकूण किंमत सुमारे ८९ लाख रुपये इतकी आहे. अजित पवार यांनी १ कोटी ५ लाख रुपयांचे कर्ज घेतले आहे. तर त्यांच्या पत्नी सुनेत्रा यांच्या नावावर २ कोटी ६८ लाखांचे कर्ज आहे.

दरम्यान, आता नव्याने उपमुख्यमंत्री झालेल्या अजित पवारांना शासनाकडून दरमहा ३ लाखापर्यंत पगार तसेच मोफत निवास सुविधा आणि वैद्यकीय सेवा, प्रवास भत्ता, दूरध्वनी भत्ता आणि सुविधा दिल्या जातील.