Ahmedabad Plane Crash 2025: अहमदाबाद इथून लंडनला रवाना झालेल्या एअर इंडियाच्या विमानाने उड्डाण केल्यानंतर अवघ्या काही मिनिटांतच ते कोसळले. या दुर्घटनेत जवळपास २५६ जणांचा मृत्यू झाला. यामध्ये दोन वैमानिक, १० क्रू सदस्य आणि २३२ प्रवासी होते. इतिहासात पहिल्यांदाच बोईंग ७८७ ड्रीमलाइनर हे विमान अपघातग्रस्त झाल्याचे कळते.
हा अपघात झाल्यानंतर बोईंग विमानांबाबत अनेक खुलासे समोर येत आहेत. ही विमानं बनवण्यात खूपच घाई केल्याचे, बोईंगच्या एका माजी कर्मचाऱ्याने सांगितले होते. तसंच नियमांना पायदळी तुडवत ही विमानं तयार केल्याचा दावा या कर्मचाऱ्याने केला होता. दरम्यान, या विमानांच्या टेस्टिंगनंतर काही गोष्टी उघड केल्यानंतर काही दिवसांनीच या कर्मचाऱ्याचा रहस्यमयरित्या मृत्यू झाला होता.
अहमदाबाद विमान दुर्घटनेनंतर बोईंग-७८७ ड्रीमलाइनर विमानाबाबत अनेक गोष्टी समोर येत आहेत. एरो इनसाइडच्या वृत्तानुसार, ड्रीमलाइनर विमानात इंजिन, गिअर, फ्लॅप, केबिन प्रेशरमध्ये कमी आणि जास्त उंचीसंबंधित समस्या समोर आल्या आहेत. एअर इंडिया स्वत: या अडचणींशी झुंजत आहे. १३ डिसेंबर २०२४ ला नवी दिल्लीहून बर्मिंगहॅमला प्रवास करताना AI-113 या विमानाने बर्मिंगहॅमच्या रनवे-१५ वर नोज गिअरमध्ये हायड्रोलिक लीकच्या सूचना दिल्या होत्या.
२०११ मध्ये एअर इंडियाच्या ताफ्यात सामील झाले होते बोईंग विमान
२०११ मध्ये एअर इंडियाने बोईंग ७८७ ड्रीमलाइनर हे विमान आपल्या ताफ्यात सामील केले होते. हे १८६ फूट लांबीचे विमान आहे. त्याच्या पंखांचा विस्तार १९७ फूट आहे. २४८ प्रवाशांची क्षमता या विमानाची आहे. विमानाची रेंज १३ हजार ५३० किलोमीटर आहे. हे जनरल इलेक्ट्रिक जेएनएक्स-१बी/रोल्स रॉयस ट्रेंट १०० इंजिनद्वारे संचालित आहे.
इंधन गळतीची समस्या
मार्च २०१३ मध्ये जपान एअरलाइन्स-७८७ विमानात दोनदा इंधन गळतीची समस्या निर्माण झाली, त्यामुळे विमान उड्डाण करू शकले नाही. त्याचप्रमाणे युनायटेड एअरलाइन्सच्या ७८७ विमानाच्या मुख्य बॅटरीमध्ये समस्या असल्याचे वृत्त आले. त्यानंतर जपान आणि अमेरिका या दोन्ही सरकारांनी व्यापक आढावा घेतला आणि त्यांच्या विमानांच्या उड्डाणांना काही काळासाठी स्थगित केले.
दुर्घटनेविषयी…
- अहमदाबादहून लंडनला जाणारे एअर इंडियाचे विमान कोसळले
- विमानात होते २४२ प्रवासी
- विमानात दोन वैमानिक आणि १० केबिन क्रू सदस्यही होते
- गुजरातचे माजी मुख्यमंत्री विजय रुपाणी यांचा या दुर्घटनेत मृत्यू झाला आहे.
- राष्ट्रपती द्रौपदी मुर्मू, पंतप्रधान नरेंद्र मोदी यांनी व्यक्त केलं दुःख
- २४२ पैकी एक प्रवासी बचावला.
या ठिकाणी उड्डाण न करण्याचा सल्ला देण्यात आला
भारतात जोरदार वादळ असलेल्या भागात ड्रीमलायनरचे उड्डाण टाळण्याचा सल्ला बोईंग कंपनीने दिला होता, कारण यामुळे इंजिनवर बर्फ तयार होण्याचा धोका वाढतो. यामुळे दिल्ली-टोकियो मार्गावरील विमानांचे उड्डाण थांबवावे लागले. एअर इंडियाचे दिल्ली-कोलकाता ७८७ विमान विंडशील्डमध्ये तडा गेल्याने दिल्लीला परतले होते.
एअर इंडियाच्या ताफ्यात हे विमान समाविष्ट केल्यानंतर एअर इंडियाच्या ड्रीमलायनर विमानाला १३६ समस्यांना तोंड द्यावे लागले, त्यामुळे एअर इंडियाला कोट्यवधी रुपयांचे नुकसान झाले. या समस्या उद्भवल्यानंतर अमेरिकेतील फेडरल एव्हिएशन अॅडमिनिस्ट्रेशनने बोईंगच्या ड्रीमलायनरची चौकशी सुरू केली.
२०१५ ते २०२४ दरम्यान एअर इंडियाच्या ७८७ ड्रीमलायनरमध्ये अनेक समस्या आढळून आल्या. याच्याशी निगडीत सुमारे ३२ घटना घडल्या. तांत्रिक अडचणींमुळे या अपघातात अनेक प्रवासी जखमी झाले. मात्र, अजूनपर्यंत कोणतीही जीवितहानी झालेली नव्हती. अहमदाबादची घटना ही एकमेव घटना आहे, ज्यामध्ये इतक्या मोठ्या प्रमाणात जीवितहानी झाली आहे.
बोईंगच्या इंजिनीअरने उघड केलं सत्य
२०२४ मध्ये बोईंग अभियंता सॅम सालेहपूर यांनी या विमानाच्या संरचनेबद्दल प्रश्न उपस्थित केले होते. सॅम म्हणाले होते की, विमान उत्पादक कंपनी बोईंगने विमान बनवताना काही शॉर्टकट घेतले होते. ७८७ ड्रीमलायनर विमानाच्या फ्यूजलेजचे काही भाग चुकीच्या पद्धतीने एकत्र केले गेले होते. हजारो उड्डाणांनंतर ते हवेतच तुटू शकतात, अशी माहितीही सॅम यांनी दिली होती.
बोईंग कर्मचाऱ्याचा रहस्यमय परिस्थितीत मृत्यू
बोईंगचे माजी कर्मचारी जॉन बार्नेट यांचा २०१७ मध्ये रहस्यमय परिस्थितीत मृत्यू झाला होता. त्यांच्या मृत्यूपूर्वी ते कंपनीविरुद्ध व्हिसलब्लोअर खटल्यात साक्ष देणारे एकमेव कर्मचारी होते. बार्नेट यांनी ३० वर्षे बोईंगमध्ये काम केले. बार्नेट यांनी बीबीसीला सांगितले होते की, ७८७ ड्रीमलायनरच्या रचनेत बोईंगने निकृष्ट दर्जाचे सुटे भाग वापरले आहेत. विमान बांधण्याची घाई करत सुरक्षा मानकांशी तडजोड करण्यात आली. असेंब्ली प्रक्रिया घाईघाईने करण्यात आली.
निकृष्ट दर्जाच्या पार्ट्सचा वापर
बोईंग कंपनीने बार्नेट यांचे सर्व दावे फेटाळून लावले. गुणवत्ता नियंत्रण अभियंता जॉन बार्नेट यांनी इशारा दिला होता की, या विमानांचे उड्डाण हे २५ टक्के निकामी ठरू शकते.
बार्नेट यांनी सांगितले होते की, विमाने वेळेवर तयार करता यावीत म्हणून कचऱ्याच्या डब्यातून निकृष्ट दर्जाचे सुटे भाग काढून विमानात बसवण्यात आले. आपत्कालीन ऑक्सिजन सिस्टीममध्येही बिघाड असल्याचा दावा त्यांनी केला होता. बार्नेट यांना विमानातील अडचणी लक्षात आल्यावर त्यांनी बोईंग व्यवस्थापकांसमोर हा मुद्दा उपस्थित केला होता, मात्र कोणतीही कारवाई करण्यात आली नाही. यूएस नॅशनल ट्रान्सपोर्टेशन सेफ्टी बोर्डाच्या २०१७ च्या पुनरावलोकनात बार्नेटच्या काही निरीक्षणांची खात्री करून घेण्यात आली. परिणामी, बोईंगला सुधारात्मक कारवाई करण्याचे आदेश देण्यात आले. बार्नेट यांनी केलेल्या दाव्यांनंतर त्यांना मोठ्या प्रमाणात विरोधाचा सामना करावा लागला होता. २०२४ मध्ये रहस्यमयरित्या त्यांचा मृत्यू झाला. त्यानंतर त्यांच्या कुटुंबीयांनी बोईंगसंबंधित मानसिक आघाताचा उल्लेख करून कंपनीविरोधात खटला दाखल केला. बोईंग पार्टनर सुविधेतील मेकॅनिक रिचर्ड क्युवास यांनी २०२३ मध्ये निकृष्ट उत्पादन केल्याचा आरोप केला होता. त्यानंतर त्यांनाही नोकरीतून बडतर्फ करण्यात आले होते.
याआधी बोईंग ७३७ विमानाचेही अनेक अपघात
२०२४ मध्ये दक्षिण कोरियामध्ये एक बोईंग विमान कोसळले, यामध्ये सुमारे १८० जणांना आपला जीव गमवावा लागला. यामध्ये बोईंगचे ७३७-८०० विमान होते, ते ७३७ मॅक्सचे नवीन व्हर्जन होते. मागील वर्षी जानेवारीमध्येही बोईंग ७३७ मॅक्स विमानाच्या दरवाजाचे प्लग उडाले होते. २०१८ आणि २०१९ च्या अपघातांमध्ये अनुक्रमे १८९ आणि १५७ जणांना आपला जीव गमवावा लागला. असं असूनही बोईंग ७३७-८०० अजूनही कार्यरत आहे.
बोईंग विमानांमध्ये नेमके बिघाड काय?
जेव्हा बोईंग विमाने सतत क्रॅश होत होती, तेव्हा बोईंग ७३७ मॅक्सची चौकशी करण्यात आली. तपासात मॅन्युव्हरिंग कॅरेक्टरिक्स ऑगमेंटेशन सिस्टम (MCAS) शी संबंधित बिघाड उघडकीस आला. या प्रणालीमुळे मॅन्युअल लँडिंगवरील अवलंबून राहण्याचे प्रमाण कमी झाले, मात्र वैमानिकांना त्याबद्दल पुरेशी माहिती देण्यात आली नाही; यामुळे परिस्थिती अशी आली की, २०१८ आणि २०१९ मध्ये ३४६ प्रवासी आणि क्रू मेंबर्सना आपला जीव गमवावा लागला. या अपघातानंतर या विमानांचे उड्डाण बंद करण्यात आले. नंतर ते अपडेट करून बोईंग ७३७-८०० म्हणून वापरात आणण्यात आले. अहमदाबादमधील विमान अपघातात बोईंगच्या ७८७ ड्रीमलायनरचा समावेश होता. ब्लॅक बॉक्स सापडल्यानंतर या दुर्घटनेचा खुलासा होऊ शकेल
