Saroj Patil: “पवार थकले म्हणून डिवचता…”, लाडक्या भावासाठी बहीण सरोज पाटील यांची जबरदस्त कविता

मुश्रीफ गाडला जाणार – सरोज पाटील

सरोज पाटील आपल्या भाषणात म्हणाल्या की, कागलच्या सभेला भरपूर गर्दी झाली आहे. याचा अर्थ यावेळी मुश्रीफ नक्की गाडला जाणार. आम्ही ब्रिटिशांच्या विरोधात लढलेली लोकं आहोत. त्यामुळे आमचे रक्त स्वाभिमानाने उसळते. पारतंत्र्यापेक्षाही आताचा काळ वाईट आहे. शरद पवारांनी मुश्रीफांना काय नाही दिले? असे असतानाही भ्रष्टाचार केला. दोन्ही हातांनी खा-खा खाल्ले आणि तुरुंगाच्या भीतीने पळून जायचे. आमचे जयंत पाटील आणि शरद पवार यांच्याकडे बघा. त्यांना ईडी लागली का? ज्यांनी भरपूर खाल्ले त्यांनाच ईडीची भीती वाटते.

आपल्या मुलांना भिडे गुरूजींच्या नादाला लावू नका

तिकडे गेल्यानंतर तुमची मुले भिडे गुरूजीच्या नादाला लागतील. ते तुमच्या पैशे, दारू, जेवण, पेट्रोल देतील आणि मग गाड्या उडव्या म्हणतील. तेव्हा आपली मुले काय करतात, ते आवर्जून बघा. घाणेरड्या गटारगंगेत मुलांना जाऊ देऊ नका, असेही सरोज पाटील यांनी म्हटले.

सरोज पाटील यांची शरद पवारांसाठी कविता:

ईडीची भीती घालता कुणाला,
समोर निष्कलंक मोती उभा आहे,
कुस्तीचे डावपेच कुणाला सांगता
समोर भल्याभल्यांना अस्मान दाखविणारा हिंदकेसरी उभा आहे,

पवारांनी काय केलं, असं दररोज विचारता
पेटलेली मुंबई विझविण्यासाठी, दिल्लीच्या सत्तेवर निखारा ठेवून हा अवलीया उभा राहिला,

जातीवादी कुणाला म्हणता?
नामांतरासाठी राजकीय कारकिर्द पणाला लावणारा हा योद्धा उभा आहे

चोरासारखे उमेदवार का चोरता
समोर लोखंडाचे सोने करणारा परिस उभा आहे,
पवार थकले म्हणून कुणाला डिवचता
समोर ८४ वर्षांचा तरूण उभा आहे,
संपविण्याची भाषा कुणासाठी वापरता,
समोर समुद्र उभा आहे,
हिमालयाचा रुबाब कुणाला सांगता,
समोर निधड्या छातीचा सह्याद्री उभा आहे.