आयटीएफ महिला टेनिस स्पर्धा बीव्हीजी पुणे खुल्या आयटीएफ महिला अजिंक्यपद टेनिस स्पर्धेच्या एकेरीत स्लोव्हेनियाच्या तामरा झिदनसेक हिने भारताच्या कारमान कौर थंडीचा ६-३, ६-४ असा पराभव करून विजेतेपद संपादन केले. बालेवाडी येथील शिवछत्रपती क्रीडा संकुलात रंगलेल्या अंतिम फेरीत अव्वल मानांकित झिदनसेकने आपली विजयी घौडदौड कायम ठेवत चौथ्या मानांकित कारमानवर १ तास २९ मिनिटांत मात करून विजेतेपद पटकावले. पहिल्या सेटमध्ये तामराने आक्रमक खेळ करत पहिल्याच गेममध्ये कारमानची सव्‍‌र्हिस रोखली आणि २-० अशी आघाडी घेतली. नवव्या गेममध्येही झिदनसेकने कारमानची पुन्हा एकदा सव्‍‌र्हिस भेदत हा सेट ६-३ असा जिंकत आघाडी घेतली. दुसऱ्या सेटमध्ये दोन्ही खेळाडूंनी आपापल्या सर्व्हिस राखत जिगरबाज खेळाचे प्रदर्शन केले. ५-४ अशा परिस्थिती असताना १०व्या गेममध्ये तामराने कारमानची सव्‍‌र्हिस भेदली व हा सेट ६-४ असाजिंकून विजेतेपदावर नाव कोरले. तामरा म्हणाली की, विजेतेपद पटकावल्यामुळे मला खूप आनंद झाला आहे. कारमान एक उत्कृष्ट खेळाडू असून तिच्यासोबतची लढत चुरशीची झाली. विजेतेपद मिळवणारी तामरा झिदनसेक (डावीकडे) व कारमान कौर.
