World Cup 2023: ‘बुमराह खेळला नाही तर विश्वचषक…’, टीम इंडियाच्या माजी खेळाडूच मोठं वक्तव्य

मोहम्मद कैफ म्हणाला, नॉकआऊट सामन्यांमध्ये टीम इंडियासाठी बुमराह खूप महत्त्वाचा असणार आहे. जर तो खेळला नाही, तर आशिया कप २०२२ आणि टी-२० वर्ल्ड कप २०२२ मध्ये टीम इंडियाचे जे झाले तेच होईल. आशिया चषक स्पर्धेतील सुपर-फोर फेरीत भारताचा पराभव झाला होता, तर टी-२० विश्वचषक स्पर्धेच्या उपांत्य फेरीत इंग्लंडने १० विकेट्सने पराभव केला होता. तो म्हणाला की, भारताकडे दोन किंवा तीन संघ उतरवण्याची क्षमता आहे, पण गोलंदाजीत तितकी खोली नाही.

कैफ म्हणाला, सध्या जे खेळाडू जखमी आहेत, ते विश्वचषकात भारतासाठी खूप महत्त्वाचे असतील. त्यांच्या पुनरागमनावर टीम इंडियाच्या आशा टिकून आहेत. बुमराहचे प्रदीर्घ कालावधीनंतर संघात पुनरागमन झाले असून तो खेळल्यानंतरच तो किती तंदुरुस्त आहे हे कळेल. मायदेशात विश्वचषकात चांगली कामगिरी करण्यासाठी भारताला पूर्णपणे तंदुरुस्त बुमराहची गरज आहे. गोलंदाजी विभागात तुमच्याकडे दोन संघ असू शकत नाहीत. जर बुमराहने वर्ल्ड कप खेळला नाही, तर टीम इंडिया या स्पर्धेतून बाहेर पडेल. आशिया चषक टी-२० २०२२ आणि टी-२० विश्वचषक २०२२ प्रमाणेच संघाचे भवितव्य असेल. कारण आपल्याकडे बुमराहसाठी बॅकअप नाही.

हेही वाचा – Sunil Dev : टी-२० विश्वचषक विजेत्या टीम इंडियाच्या व्यवस्थापकाचे निधन, वयाच्या ७५व्या वर्षी घेतला अखेरचा श्वास

४२ वर्षीय कैफ म्हणाला की, सध्या आमचा संघ मजबूत दिसत नाही. तो म्हणाला, टीम इंडिया सध्या कमकुवत दिसत आहे. कारण केएल राहुल, ऋषभ पंत आणि श्रेयस अय्यरसारखे अनेक महत्त्वाचे खेळाडू दुखापतीमुळे संघाबाहेर आहेत. कैफने वेस्ट इंडिजमधील एकदिवसीय मालिकेदरम्यान भारतीय संघ व्यवस्थापनाच्या प्रयोगांबद्दलही सांगितले. संघ व्यवस्थापनाने नियमित कर्णधार रोहित शर्मा आणि विराट कोहलीला दुसऱ्या आणि तिसऱ्या वनडेसाठी विश्रांती दिली होती.

कैफ पुढे म्हणाला, वेस्ट इंडिजमध्ये त्यांनी काय केले यावरूम मी संघाला जज करणार नाही. होय, मला असे म्हणायचे आहे की, जर रोहित शर्मा आणि विराट कोहलीला ब्रेक हवा होता, तर त्यांना संघात स्थान मिळायला नको होते. आशिया चषकानंतर मी या संघाला जज करेन आणि त्या १५ खेळाडूंचेही विश्लेषण करेन. आशिया चषकानंतर, या संघाला माहित असले पाहिजे की त्यांचे प्लेइंग-११ कोणती आहे आणि त्यांचे बॅकअप कोण आहेत. विश्वचषकात इशान किशनचा राखीव यष्टीरक्षक म्हणून समावेश करण्याचा सल्लाही कैफने दिला.

हेही वाचा – Manoj Tiwary Retirement: टीम इंडियाच्या फलंदाजाने विश्वचषकापूर्वी घेतली निवृत्ती, सोशल मीडियावर शेअर केली भावनिक पोस्ट

मोहम्मद कैफ म्हणाला, इशानने आतापर्यंत चांगली कामगिरी केली आहे. मला अजूनही खात्री नाही की इशान, सूर्यकुमार, संजू सॅमसन आणि श्रेयस अय्यर १५ मध्ये एकत्र असतील की नाही. राहुल जर विश्वचषक खेळला, तर त्याचा बॅकअप यष्टिरक्षक कोण असेल हेही पाहणे महत्त्वाचे ठरणार आहे. इशानला बॅकअप म्हणून ठेवावे. टीम इंडिया उपांत्यपूर्व फेरीसाठी पात्र ठरेल, असे कैफला वाटते. तो म्हणाला, भारतीय संघासाठी विश्वचषक उपांत्य फेरीपासून सुरू होईल. वर्ल्ड कप ट्रॉफी जिंकण्यासाठी टीम इंडियाला दोन मोठे आणि महत्त्वाचे सामने जिंकावे लागतील.