ICC Cricket World Cup 2023, India vs Australia: आयसीसी क्रिकेट विश्वचषक सुरू झाला आहे, परंतु भारताच्या क्रिकेट चाहत्यांसाठी, अद्याप विश्वचषक सुरू झालेला नाही. कारण भारताचा पहिला विश्वचषक सामना ८ ऑक्टोबर रोजी ऑस्ट्रेलिया विरुद्ध चेन्नई येथे होणार आहे. आता हा सामना सुरू होण्यासाठी २४ तासांपेक्षा कमी कालावधी शिल्लक आहे. या सामन्यापूर्वी आपण संभाव्य प्लेइंग इलेव्हन, पिच रिपोर्ट आणि मॅच प्रिडीक्शनबद्दल जाणून घेऊया.
भारत आणि ऑस्ट्रेलिया यांच्यातील हा सामना विश्वचषकातील पाचवा सामना असेल. हा सामना चेन्नईच्या एमए चिदंबरम स्टेडियमवर दुपारी २ वाजता सुरू होईल. भारत आणि ऑस्ट्रेलिया यांच्यात एकदिवसीय फॉर्मेटमध्ये एकूण १४९ सामने खेळले गेले आहेत, त्यापैकी भारताने ५६ आणि ऑस्ट्रेलियाने ८३ एकदिवसीय सामने जिंकले आहेत, तर १० सामन्यांचा निकाल लागला नाही.
मॅच प्रिडीक्शन –
याशिवाय, हे दोन्ही संघ एकदिवसीय विश्वचषक स्पर्धेत एकूण १२ वेळा आमनेसामने आले आहेत, त्यापैकी ऑस्ट्रेलियाने ८ आणि भारताने फक्त ४ सामने जिंकले आहेत. त्याच वेळी, चेन्नईच्या मैदानावर भारत आणि ऑस्ट्रेलिया यांच्यात ३ एकदिवसीय सामने खेळले गेले आहेत, ज्यामध्ये ऑस्ट्रेलियाने २ जिंकले आहेत आणि भारताने फक्त १ सामना जिंकला आहे. या आकडेवारीनुसार ऑस्ट्रेलियाचा वरचष्मा असला, तरी या विश्वचषकात विश्वविजेते होण्यासाठी दोन्ही संघ प्रबळ दावेदार मानले जात आहेत. अशा परिस्थितीत दोघांमध्ये कडवी स्पर्धा अपेक्षित आहे.
पिच रिपोर्ट –
चेन्नईची खेळपट्टी फिरकीपटूंसाठी नेहमीच उपयुक्त असते. या खेळपट्टीला सहसा फिरकी ट्रॅक म्हणतात, तथापि, फलंदाजांना देखील धावा काढण्याची संधी असते. ही खेळपट्टी कोरडी आहे आणि जसजसा सामना पुढे जाईल तसतसा वेग कमी होतो. यामुळे या खेळपट्टीवर नंतर फलंदाजी करणे कठीण आहे. त्यामुळे नाणेफेक जिंकल्यानंतर संघ प्रथम फलंदाजी करण्यास प्राधान्य देतात.
हवामानाचा अंदाज –
या सामन्यादरम्यान चेन्नईतील हवामान स्वच्छ राहण्याची अपेक्षा आहे. येथील सरासरी तापमान ३१ अंश सेल्सिअस राहील, तर आर्द्रता ७१ टक्क्यांपर्यंत राहील. वाऱ्याचा वेग सुमारे १४ किलोमीटर प्रति तास असेल, तर पावसाचा अंदाज ५०% आहे.
भारताची संभाव्य प्लेइंग इलेव्हन –
रोहित शर्मा (कर्णधार), इशान किशन, विराट कोहली, श्रेयस अय्यर, केएल राहुल (यष्टीरक्षक), हार्दिक पांड्या, रवींद्र जडेजा, रविचंद्रन अश्विन, कुलदीप यादव, जसप्रीत बुमराह, मोहम्मद सिराज.
ऑस्ट्रेलियाची संभाव्य प्लेइंग इलेव्हन –
डेव्हिड वॉर्नर, मिचेल मार्श, स्टीव्ह स्मिथ, मार्नस लाबुशेन, ग्लेन मॅक्सवेल, कॅमेरुन ग्रीन, जोश इंग्लिस (यष्टीरक्षक), पॅट कमिन्स (कर्णधार), मिचेल स्टार्क, सीन अॅबॉट, अॅडम झाम्पा.
