IND vs BAN, Asia Cup: एक अकेला सब पे भारी! शुबमन गिलचे झुंजार शतक, वन डेमध्ये केल्या हजार धावा पूर्ण

एकदिवसीय क्रिकेटमध्ये शुबमन गिलचे पाचवे शतक

शुबमन गिलने ११७ चेंडूत आपले शतक पूर्ण केले आहे. त्याने आतापर्यंतच्या त्याच्या शतकी खेळीत ६ चौकार आणि ४ षटकार मारले आहेत. त्याचे वन डे कारकिर्दीतील हे पाचवे शतक आहे. त्याचबरोबर त्याने एकदिवसीय क्रिकेटमध्ये १००० धावा पूर्ण केल्या आहेत. त्याच्या या शानदार खेळीमुळे टीम इंडिया या सामन्यात कायम आहे. गिल व्यतिरिक्त कोणताही भारतीय फलंदाज विशेष काही करू शकलेला नाही. या डावात २६ धावा करणारा सूर्यकुमार दुसरा सर्वोत्तम धावा करणारा फलंदाज आहे. २०९ धावांवर भारताची सातवी विकेट पडली. शुबमन गिल १३३ चेंडूत १२१ धावा करून बाद झाला. मेहदी हसनने त्याला तौहित हृदयकरवी झेलबाद केले.

कठीण परिस्थितीत दमदार खेळी करून संघाला सांभाळणे आणि तिथून संघाला बाहेर काढणे हे खूप कठीण काम असते. मात्र, अशावेळी जे हे असे काम करतो तोच खेळाडू महान होतो. हेच परिपूर्ण खेळाडूचे लक्षण असते. टीम इंडियाचा युवा फलंदाज शुबमन गिलकडून अशाच कामगिरीची अपेक्षा होती आणि गिलही हळूहळू ती पूर्ण करत आहे. आशिया चषक २०२३च्या सुपर-४ सामन्यात बांगलादेश विरुद्ध एका बाजूने जेव्हा फलंदाज बाद होत होते तेव्हा शुबमन गिल तंबू ठोकून एकटा उभा राहून टीम इंडियाला विजयाचे दिशेने घेऊन जाण्यचा प्रयत्न केला. त्याचे हे शानदार शतक सर्वांच्याच स्मरणात राहील.

हेही वाचा: Asia Cup 2023: आशिया चषक फायनलआधी श्रीलंकेला मोठा धक्का! ‘हा’अष्टपैलू खेळाडू दुखापतीमुळे संघातून पडू शकतो बाहेर

२०२३मध्ये शुबमनची अप्रतिम कामगिरी

या स्पर्धेपूर्वी काही काळ वाईट अवस्थेतून जात असलेल्या शुबमन गिलने नेपाळ आणि पाकिस्तानविरुद्ध अर्धशतके झळकावून पुनरागमन केले आणि आता शतकही केले. एवढेच नाही तर गिलने या वर्षी वनडे क्रिकेटमध्ये १००० धावाही पूर्ण केल्या. गिलने अवघ्या १७ डावात हा आकडा गाठला. त्याच्याशिवाय या वर्षी इतर कोणत्याही फलंदाजाने १००० धावा केल्या नाहीत. एकूणच, गिलचे यंदाच्या तिन्ही फॉरमॅटमधील हे सहावे शतक आहे. त्‍याने टी२०आणि कसोटीमध्‍ये प्रत्येकी एक शतक झळकावले आहे.

आशिया कप स्पर्धेत शतक झळकावणाऱ्या भारताच्या सर्वात युवा फलंदाजांमध्ये शुबमन चौथ्या क्रमांकावर आला. त्याने २४ वर्ष व ७ दिवसांचा असताना हे शतक झळकावले अन् महेंद्रसिंग धोनीचा २००८ ( २६ वर्ष व ३५४ दिवस) सालचा विक्रम मोडला. सुरेश रैना ( २१ वर्ष व २११ दिवस, २००८), सचिन तेंडुलकर ( २१ वर्ष व ३५० दिवस, १९९५) आणि विराट कोहली ( २३ वर्ष व १२९ दिवस, २०१२) हे आघाडीवर आहेत.