IND vs ENG : जोस बटलरचा भारताविरुद्ध मोठा पराक्रम! टी-२० क्रिकेटमध्ये ‘ही’ कामगिरी करणारा जगातील पहिलाच खेळाडू

चेपॉक स्टेडियमवर जोस बटलरने ३० चेंडूंचा सामना करताना २ चौकार आणि ३ षटकार मारत ४५ धावांची खेळी साकारली. मात्र, त्याला दुसऱ्या बाजूनी साथ मिळाली नाही. या खेळीसह तो तो भारताविरुद्ध आंतरराष्ट्रीय टी-२० क्रिकेटमध्ये सर्वाधिक धावा करणारा फलंदाज ठरला आहे. जोस बटलरने आतापर्यंत भारताविरुद्धच्या २४ टी-२० आंतरराष्ट्रीय सामन्यांमध्ये एकूण ६०४ धावा केल्या आहेत, ज्यामध्ये त्याने ५ अर्धशतके झळकावली आहेत.

बटलरने पूरनला टाकले मागे –

भारताविरुद्धच्या टी-२० आंतरराष्ट्रीय क्रिकेटमध्ये ६०० धावांचा आकडा पार करणारा तो एकमेव फलंदाज आहे. बटलरच्या आधी भारताविरुद्ध सर्वाधिक धावा करण्याचा विक्रम निकोलस पूरनच्या नावावर होता. पूरनने भारताविरुद्ध ५९२ धावा केल्या होत्या. आता बटलरने पूरनला मागे टाकले आहे.

भारताविरुद्ध टी-२० आंतरराष्ट्रीय क्रिकेटमध्ये सर्वाधिक धावा करणारे फलंदाज:

जोस बटलर- ६०४ धावा
निकोलस पूरन- ५९२ धावा
ग्लेन मॅक्सवेल- ५७४ धावा
डेव्हिड मिलर- ५२४ धावा
ॲरॉन फिंच- ५०० धावा

टी-२० आंतरराष्ट्रीय क्रिकेटमध्ये १५० षटकार पूर्ण –

भारताविरुद्धच्या दुसऱ्या टी-२० सामन्यात जोस बटलरने ३ षटकार ठोकले. यासह त्याने टी-२० आंतरराष्ट्रीय क्रिकेटमध्ये १५० षटकार पूर्ण केले आहेत. टी-२० आंतरराष्ट्रीय क्रिकेटमध्ये १५० षटकार पूर्ण करणारा तो इंग्लंडचा पहिला फलंदाज ठरला आहे. टी-२० आंतरराष्ट्रीय क्रिकेटमध्ये सर्वाधिक षटकार मारण्याचा विक्रम रोहित शर्माच्या नावावर आहे. त्याने २०० षटकार मारले आहेत. विशेष म्हणजे बटलरने २०११ मध्ये भारताविरुद्ध इंग्लंडकडून टी-२० आंतरराष्ट्रीय पदार्पण केले होते.