India vs Afghanistan 1st T20 Highlights, 11 January 2024 : मोहाली स्टेडियमवर भारत आणि अफगाणिस्तान यांच्यात तीन सामन्यांच्या टी-२० मालिकेतील पहिला सामना खेळला गेला. भारताने नाणेफेक जिंकून प्रथम गोलंदाजी करण्याचा निर्णय घेतला. अफगाणिस्तानने प्रथम फलंदाजी करताना पाच गडी गमावून १५८ धावा केल्या. प्रत्युत्तरात भारताने शिवम दुबेच्या वादळी अर्धशतकाच्या जोरावर १७.३ षटकांत चार गडी गमावून लक्ष्य गाठले. जूनमध्ये होणाऱ्या टी-२० विश्वचषकापूर्वी टीम इंडियाची ही शेवटची टी-२० मालिका आहे. त्याचबरोबर या मालिकेसाठी कर्णधार रोहित शर्मा आणि विराट कोहली यांचेही टी-२० संघात पुनरागमन झाले आहे. विराट वैयक्तिक कारणांमुळे पहिला सामना खेळला नाही. त्याचबरोबर अफगाणिस्तानचा स्टार फिरकी गोलंदाज राशिद खान दुखापतीमुळे संपूर्ण मालिकेतून बाहेर आहे. या मालिकेतील दुसरा सामना १४ जानेवारीला इंदूरमध्ये खेळवला जाईल.