India vs New Zealand 1st T20 Highlights Score Updates: भारत आणि न्यूझीलंड संघात तीन सामन्यांच्या टी-२० मालिकेतील पहिला टी-२० सामना एमएस धोनीचे होम ग्राउंड असलेल्या झारखंड स्टेट क्रिकेट असोसएशन मैदानावर खेळला गेला. या सामन्यात प्रथम फलंदाजी करताना न्यूझीलंडने २० षटकांत ६ बाद १७६ धावा केल्या होत्या. त्यामुळे भारतीय संघाला १७७ धावांचे लक्ष्य मिळाले होते. प्रत्युतरात भारतीय संघाला निर्धारित २० षटकांत ९ बाद १५५ धावाच करता आल्या. त्यामुळे न्यूझीलंड संघाने २१ धावांनी शानदार विजय मिळवत तीन सामन्यांच्या मालिकेत १-० ने आघाडी घेतली. नाणेफेक हारल्यानंतर न्यूझीलंडने २० षटकांत ६ गडी गमावून १७६ धावा केल्या. डेव्हॉन कॉनवेने ५२ आणि डॅरिल मिशेलने नाबाद ५९ धावा केल्या. भारतीय संघ २० षटकात विकेट गमावून केवळ १५५ धावा करू शकला. भारताकडून सूर्यकुमार यादवने ४७ आणि वॉशिंग्टन सुंदरने ५० धावा केल्या. अर्शदीप सिंगने २०व्या षटकात दिलेल्या २७ धावांनी न्यूझीलंडचा आत्मविश्वास उंचावला. त्यानंतर पाहुण्यांच्या फिरकीपटूंनी भारतीय फलंदाजांना पळताभुई थोडी केली. ३ फलंदाज १५ धावांवर माघारी परतले होते आणि ‘मिस्टर ३६०’ अशी ओळख असणाऱ्या सूर्यकुमार यादव व हार्दिक पांड्या यांनी सामन्यात पकड घेतली होती. पण, ४ चेंडूंनी सामना फिरला अन् त्यानंतर भारताचा डाव गडगडला. वॉशिंग्टन सुंदरने दोन विकेट्ससह अर्धशतकी खेळी करून भारताच्या विजयासाठी पुरेपूर प्रयत्न केला.