IPL 2023 MI vs SRH: अर्जुनने घेतला सचिन तेंडुलकरचा बदला, वडिलांना शून्यावर बाद करणाऱ्या ‘या’ खेळाडूची घेतली विकेट

अर्जुन तेंडुलकरने वडिलांचा वर्षानुवर्षांचा बदला घेतला –

अर्जुन तेंडुलकरने शेवटच्या षटकात भुवनेश्वर कुमारला बाद करताना वडिलांचा वर्षानुवर्षे जुना बदलाही घेतला. २००८-०९ च्या रणजी हंगामात सचिन तेंडुलकर मुंबईकडून खेळत होता. त्यावेळी भुवनेश्वर कुमार १९ वर्षांचा होता आणि तो उत्तर प्रदेशकडून खेळत होता. या दोघांमध्ये झालेल्या सामन्यात सचिनसमोर गोलंदाजी करायला आलेल्या भुवनेश्वर कुमारच्या इनस्विंगरवर सचिन तेंडुलकर शून्यावर बाद झाला होता.

या विकेटनंतर भुवनेश्वर कुमारच्या चर्चा सर्वत्र रंगू लागल्या. रणजी ट्रॉफीमध्ये सचिन तेंडुलकरला शून्यावर बाद करणारा भुवनेश्वर हा पहिला गोलंदाज ठरला. आता काही वर्षांनंतर जेव्हा सचिनचा मुलगा अर्जुनने भुवनेश्वरची विकेट घेतली, तेव्हा सगळ्यांना हा प्रसंग आठवला. अशात सचिन तेंडुलकरला शून्यावर बाद करणाऱ्या खेळाडूकडून अर्जुनने बदला घेतला.

सामन्याबद्दल बोलायचे, तर हैदराबादच्या राजीव गांधी आंतरराष्ट्रीय क्रिकेट स्टेडियमवर मुंबईने १४ धावांनी विजय मिळवला. सनरायझर्सचा कर्णधार एडन मार्करामने नाणेफेक जिंकून प्रथम गोलंदाजी करण्याचा निर्णय घेतला होता. मुंबईने २० षटकांत पाच गडी गमावून १९२ धावा केल्या होत्या. प्रत्युत्तरात हैदराबादचा संघ १९.५ षटकांत १७८ धावांवर सर्वबाद झाला.

हेही वाचा – SRH vs MI: कॅमेरामनला पाहून अर्जुन तेंडुलकरने केली शिवीगाळ? काय आहे व्हायरल VIDEO पाहा

अर्जुनने मुंबईला विजय मिळवून दिला –

सनरायझर्स हैदराबादला शेवटच्या षटकात २० धावांची गरज होती. मुंबईचा कर्णधार रोहित शर्माने युवा अर्जुन तेंडुलकरला गोलंदाजीसाठी बोलावले. अर्जुनने कर्णधाराचा विश्वास सार्थ ठरवत अवघ्या पाच धावा दिल्या. त्याच्या षटकात दोन विकेटही पडल्या. अब्दुल समद दुसऱ्या चेंडूवर धावबाद झाला आणि पाचव्या चेंडूवर अर्जुन तेंडुलकरने भुवनेश्वर कुमारला रोहित शर्माकडे झेलबाद करून सनरायझर्सचा डाव गुंडाळला. अर्जुनने २.५ षटकात १८ धावा दिल्या आणि एक बळी घेतला.