IPL 2023, SRH vs RR Cricket Score Update : इंडियन प्रीमियर लीग २०२३ चा चौथा सामना राजस्थान रॉयल्स आणि सनरायजर्स हैद्राबाद यांच्यात खेळवला जात आहे. राजस्थान रॉयल्सने प्रथम फलंदाजी करत हैद्राबादच्या गोलंदाजांचा अक्षरक्षा धुव्वा उडवला. राजस्थानचा सलामीवीर दिग्गज फलंदाज जॉस बटलरने मागील हंगामात धावांचा पाऊस पाडला होता. या सामन्यातही त्याने राजस्थानला धावांच्या दुष्काळात राहू दिले नाही. कारण बटलरने यंदाच्या आयपीएल हंगामातही धडाकेबाज फलंदाजीला सुरुवात केली असून हंगामातील वेगवान अर्धशतक झळकावण्याच्या विक्रमाची नोंद त्याच्या नावावर करण्यात आली आहे.
इतकच नव्हे तर यशस्वी जैस्वाल आणि कर्णधार संजू सॅमसनेही अर्धशतकी खेळी केली. त्यामुळे राजस्थानने २० षटाकांत ५ विकेट्स गमावत २०३ धावांपर्यंत मजल मारली. त्यानंतर या धावांचा पाठलाग करण्यासाठी मैदानात उतरलेल्या हैद्राबादच्या फलंदाजांची मात्र पुरती दमछाक झाली. कारण राजस्थानचा वेगवान गोलंदाज ट्रेंट बोल्टने पहिल्याच षटकात हैद्राबादच्या राहुल त्रिपाठी आणि अभिषेक शर्माला स्वस्तात माघारी पाठवले. बोल्टने या दोन फलंदाजांना बाद केल्याचा व्हिडीओ आयपीएलच्या ट्वीटर हॅंडलवर शेअर करण्यात आला आहे.
राजस्थानसाठी सलामीला उतरलेल्या यशस्वी जैस्वालने ३७ चेंडूत ५४ धावा केल्या. तसंच जॉस बटलरने चौफर फटकेबाजी करत २२ चेंडूत ५४ धावा कुटल्या. कर्णधार संजू सॅमसननेही हैद्राबादच्या गोलंदाजांचा समाचार घेत ३२ चेंडूत ५५ धावांची अर्धशतकी खेळी साकारली. तर हेटमायर १६ चेंडूत २२ धावांवर नाबाद राहिला. उमरान मलिकच्या वेगवान चेंडूने देवदत्त पड्डीकलचा त्रिफळा उडवला. तो अवघ्या २ धावांवर माघारी परतला. तसंच रियान परागनेही निराशाजनक कामगिरी केली. रियान ७ धावांवर बाद होत तंबूत परतला.
