रिओ ऑलिम्पिकसाठी पात्र ठरलेला पहिला नेमबाजपटू जितू रायने नेमबाजी विश्वचषकात कांस्यपदकाची कमाई करत शिरपेचात आणखी एक मानाचा तुरा खोवला. आंतरराष्ट्रीय स्तरावरील स्पर्धामधले जितूचे हे सातवे पदक आहे.
आशियाई आणि राष्ट्रकुल स्पर्धेत सुवर्णपदक नावावर करणाऱ्या जितूने चांगवोन, कोरिया येथे सुरू असलेल्या विश्वचषकात १० मीटर एअर पिस्तूल प्रकारात १८१.१ गुण मिळवले. सुवर्णपदकासाठी झालेल्या शूटआऊटमध्ये जितूचे सुवर्णपदक अवघ्या ०.४ गुणांनी हुकले. कोरियाच्या जिन जोनगोहने २०६ गुणांसह सुवर्ण तर म्यानमारच्या नाँग ये तुने रौप्यपदक पटकावले.
पात्रता फेरीत जितूने अडखळत सुरुवात केली. या फेरीत नेमबाजांना ६० वेळा लक्ष्यावर नेम साधण्याची संधी मिळते. ५८१ गुणांसह जितूने आठव्या स्थानासह अंतिम फेरी गाठली. आठ सदस्यीय अंतिम फेरीतही जितूच्या कामगिरीत सातत्य नव्हते. जितूला लौकिकाला साजेशी कामगिरी करता आली नाही. मात्र मध्यंतरानंतर कामगिरी सुधारत जितूने कांस्यपदकावर नाव कोरले.
१० मीटर एअर पिस्तूल प्रकारात प्रकाश नानजप्पाला १८व्या तर गुरप्रीत सिंगला ४८व्या स्थानावर समाधान मानावे लागले. ५० मीटर रायफल प्रोन प्रकारात चैन सिंगने ६२३.४ गुणांसह अंतिम फेरी गाठली. गगन नारंगसारख्या अव्वल नेमबाजपटूला अंतिम फेरी गाठण्यात अपयश आले. अंतिम फेरीत चैनला सातव्या स्थानावर समाधान मानावे लागले.