Waqar Younis: पाकिस्तानच्या वकार युनूसचे आश्चर्यचकित करणारे विधान; म्हणाला, “विराट कोहली एवढे शतके करेल जेवढे…”

३४ वर्षीय कोहली आता सचिनचा आणखी एक मोठा विक्रम मोडण्याच्या मार्गावर आहे, जो वन डेतील सर्वाधिक शतकांशी संबंधित आहे. सचिनने या फॉरमॅटमध्ये ४९ शतके झळकावली आहेत. जर याबाबतील सचिनला मागे टाकायचे असेल तर कोहलीला आगामी काळात फक्त तीन शतकांची गरज आहे. एकूणच सचिनने आपल्या कारकिर्दीत १०० आंतरराष्ट्रीय शतके ठोकली आहेत. पाकिस्तानचा माजी कर्णधार आणि अनुभवी वेगवान गोलंदाज वकार युनूस म्हणतो की, “जेव्हा कोहलीची कारकीर्द संपेल तेव्हा त्याच्या खात्यात इतकी शतके असतील ज्याचा लोकांना अंदाजही आला नसेल. आपण विचारही करू शकणार नाही एवढी त्याने शतके ठोकलेली असतील.”

हेही वाचा: SL vs PAK, Asia Cup: ‘करो या मरो’ सामन्यात पाकिस्तानने निम्मा संघ बदलला, प्लेईंग ११मध्ये कोणाला संधी मिळणार? जाणून घ्या

किंग कोहलीच्या ७७व्या शतकानंतर युनूसने ही विचित्र भविष्यवाणी केली आहे. युनूसने स्टार स्पोर्ट्सवर सांगितले की, “विराट आणि इतर खेळाडूंमध्ये, अगदी सचिन तेंडुलकरमध्ये खूप मोठा फरक आहे. जेव्हा सचिन तेंडुलकरने वन डे कारकीर्द पूर्ण केली तेव्हा त्याच्या नावावर ४९ शतके होती. मी हे खात्रीशीर सांगू इच्छितो की, विराटची क्रिकेट कारकीर्द संपण्यास अजून खूप काळ आहे. विराट खूप जास्त शतके करेल, ज्याचा कुणी विचारही करू शकत नाही. त्याची कारकीर्द ज्यावेळी संपुष्टात येईल त्यावेळी विराटच्या खात्यात कोणाच्याही कल्पनेपेक्षा जास्त शतके झळकावेलेले असतील.

हेही वाचा: SL vs PAK: पावसाने वाढवली पाकिस्तान-श्रीलंका संघाची धाकधूक, सामना रद्द झाल्यास कोण जाणार फायनला? जाणून घ्या समीकरण

उल्लेखनीय गोष्ट अशी आहे की, सचिनची आंतरराष्ट्रीय कारकीर्द २४ वर्षाची होती. तो १९८९ ते २०१३ पर्यंत खेळला आणि फलंदाजीत अनेक विक्रम केले. कसोटी (१५९२१) आणि एकदिवसीय (१८४२६) मध्ये सर्वाधिक धावा करणारा तो क्रिकेटपटू आहे. दरम्यान, कोहलीने २००८ मध्ये पदार्पण केले आणि अनेक विक्रम मोडले. मात्र, कसोटीत शतके ठोकण्याच्या बाबतीत कोहली सध्या सचिनपेक्षा खूपच मागे आहे. या फॉरमॅटमध्ये कोहलीने आतापर्यंत २९ तर सचिनने ५१ शतके झळकावली आहेत.