MS Dhoni Coin : एमएस धोनीच्या सन्मानार्थ सरकार सात रुपयांचे नाणे आणत आहे? काय आहे सत्य? जाणून घ्या

धोनीच्या सन्मानार्थ सात रुपयांच नाणं येणार?

सोशल मीडिया हा आजकाल प्रत्येकाच्या आयुष्याचा एक महत्त्वाचा भाग बनला आहे. या सोशल मीडियावर कधी आणि कोणाबद्दल काय व्हायरल होईल हे सांगता येत नाही. आता. एमएस धोनीबाबत असेच काहीसे घडत आहे. सोशल मीडियावर त्याच्याबद्दल एक फोटो व्हायरल होत आहे. सोशल मीडिया प्लॅटफॉर्मवर व्हायरल होत असलेल्या फोटोमध्ये आरबीआय म्हणजेच रिझर्व्ह बँकेचा उल्लेख करण्यात आला आहे. महेंद्रसिंग धोनीच्या सन्मानार्थ आरबीआय ७ रुपयांचे नवीन नाणे जारी करणार आहे. ही माहिती खरी आहे की खोटी? याबाबत प्रेस इन्फॉर्मेशन ब्युरोच्या फॅक्ट चेकमध्ये माहिती देण्यात आली आहे.

काय आहे सत्य?

प्रेस इन्फॉर्मेशन ब्युरोच्या फॅक्ट चेकमध्ये हा व्हायरल दावा खोटा असल्याचे उघड झाले आहे. त्याचबरोबर सरकारने अशी कोणतीही घोषणा केलेली नाही. अधिकृत हँडलवर पोस्ट ही माहिती देण्यात आली आहे. पोस्टमध्ये लिहिले की, “सोशल मीडियावर फिरत असलेला फोटो दावा करत आहे की भारतीय क्रिकेटमधील योगदानाबद्दल महेंद्रसिंग धोनीच्या सन्मानार्थ ७ रुपयांचे नवीन नाणे जारी केले जाईल. जो फोटो पूर्णपणे खोटा आहे आणि आर्थिक व्यवहार विभागाने अशी कोणतीही घोषणा केलेली नाही.”

हेही वाचा – SA20 : वयाच्या ३९व्या वर्षीही दिनेश कार्तिकची जबरदस्त चपळाई! हवेत उडी मारत एका हाताने टिपला अप्रतिम झेल

महेंद्र सिंग धोनीची कारकीर्द –

भारताचा सर्वात यशस्वी कर्णधार मानल्या जाणाऱ्या धोनीने याआधीच २००७ मध्ये टी-२० विश्वचषक भारतीय संघाला जिंकून दिला होता. यानंतर, २०११ मध्ये, त्याच्या नेतृत्वाखाली, भारत एकदिवसीय क्रिकेटमध्ये विश्वविजेता बनला. धोनीने आता आंतरराष्ट्रीय क्रिकेटमधून निवृत्ती घेतली असली तरी तो आयपीएलमध्ये खेळत आहे. त्याने आपल्या कारकिर्दीत ९० कसोटीत ४६७६ धावा केल्या. त्याचबरोबर त्याच्या खात्यात ३५० एकदिवसीय सामन्यांमध्ये १०७७३ धावा जमा आहेत. त्याने ९८ टी-२० सामन्यांत १६१७ धावा केल्या आहेत. त्याने आतापर्यंत आयपीएलचे २६४ सामने खेळले असून ५२४३ धावा केल्या आहेत.