IPL 2024 : विराट कोहली आयपीएलपूर्वी भारतात दाखल! विमानतळावरील VIDEO होतोय व्हायरल

विराट कोहलीने अलीकडेच इंग्लंडविरुद्ध खेळल्या गेलेल्या पाच सामन्यांच्या कसोटी मालिकेतून ब्रेक घेतला होता. विराट कोहली पत्नी अनुष्का शर्माबरोबर लंडनमध्ये त्यांच्या दुसऱ्या मुलाच्या जन्मासाठी उपस्थित होता. अनुष्का शर्माने फेब्रुवारीच्या दुसऱ्या आठवड्यात मुलगा अकायला जन्म दिला. याची माहिती खुद्द विराट कोहलीने सोशल मीडियावर दिली होती. आता विराट कोहली आपली संपूर्ण जबाबदारी पार पाडून भारतात परतला आहे.

विराट कोहली एकटाच परतला भारतात –

सध्या विराट कोहली एकटाच भारतात परतला आहे. तो लवकरच त्याच्या रॉयल चॅलेंजर्स बंगळुरू संघात सामील होईल अशी अपेक्षा आहे. विराट कोहली आपल्या संघ रॉयल चॅलेंजर्स बंगळुरूला (आरसीबी) चॅम्पियन बनवण्यासाठी उत्सुक आहे. आयपीएलच्या इतिहासात रॉयल चॅलेंजर्स बंगळुरू तीनदा फायनलमध्ये पोहोचले आहे, परंतु एकही ट्रॉफी उचलू शकली नाही आणि तिन्ही वेळा उपविजेतेपदावर समाधान मानावे लागले आहे. गेल्या आयपीएल हंगामात कोहलीने १४ सामन्यांमध्ये ५३.२५ च्या सरासरीने ६३९ धावा केल्या होत्या, ज्यात २ शतके आणि ६ अर्धशतकांचा समावेश आहे. या काळात नाबाद १०१ धावा ही त्याची सर्वोत्तम धावसंख्या होती.

हेही वाचा – IPL 2024 : चेन्नई सुपर किंग्जला मोठा धक्का, स्टार गोलंदाज आयपीएलमधून ४-५ आठवडे बाहेर राहण्याची शक्यता

विराट कोहलीची आयपीएलमधील कामगिरी –

२२ मार्चपासून सुरू होणाऱ्या आयपीएल २०२४ चा उत्साह शिगेला पोहोचणार आहे. विराट कोहली मैदानावर विक्रमांची रांग लावण्यासाठी सज्ज झाला आहे. विराट कोहली हा आयपीएलच्या इतिहासात सर्वाधिक धावा आणि सर्वाधिक शतके करणारा फलंदाज आहे. विराट कोहलीने २३७ आयपीएल सामन्यांमध्ये ३७.२५ च्या सरासरीने ७२६३ धावा केल्या आहेत. विराट कोहलीने या कालावधीत ७ शतके आणि ५० अर्धशतके केली आहेत. विराट कोहलीची आयपीएलमधील सर्वोत्तम धावसंख्या ११३ धावा आहे. आयपीएल २०२४ मध्ये रॉयल चॅलेंजर्स बंगळुरूला २२ मार्च रोजी चेन्नई सुपर किंग्ज विरुद्ध पहिला सामना खेळायचा आहे.