IND vs WI: संपूर्ण मालिकेत अपयशी ठरलेल्या संजू सॅमसनने केला मोठा पराक्रम; ‘हा’ कारनामा करणारा ठरला १३वा भारतीय

त्याने या मालिकेत ४ टी-२० सामने खेळले आणि फक्त ३२ धावा केल्या. त्याला तीन सामन्यात फलंदाजीची संधी मिळाली. तिन्ही टी-२० सामन्यांमध्ये तो खास कामगिरी करू शकला नाही आणि चाहत्यांची निराशा केली. पूर्ण फ्लॉप ठरल्यानंतरही संजू सॅमसनने एक कारनामा केला आहे. टी-२० फॉरमॅटमध्ये ६००० धावा करणारा तो १३वा भारतीय फलंदाज ठरला आहे. संजूने वेस्ट इंडिजविरुद्धच्या शेवटच्या टी-१० सामन्यात १३ धावा करत ही खास कामगिरी केली.

टी-२० क्रिकेटमध्ये सर्वाधिक धावा करणारे अव्वल ५ भारतीय फलंदाज –

टी-२० क्रिकेटमध्ये सर्वाधिक धावा करण्याच्या बाबतीत विराट कोहली पहिल्या क्रमांकावर आहे. त्याने टी-२० क्रिकेटमध्ये एकूण ११९६५ धावा केल्या आहेत. त्याच्यानंतर कर्णधार रोहित शर्माचे नाव येते, ज्याने ११०३५ धावा केल्या आहेत. तिसऱ्या क्रमांकावर शिखर धवन आहे, ज्याने टी-२० फॉरमॅटमध्ये ९६४५ धावा केल्या आहेत. चौथ्या क्रमांकावर सुरेश रैनाचे नाव आहे, ज्याने आपल्या टी-२० कारकिर्दीत एकूण ८६५४ धावा केल्या आहेत. या यादीत पाचव्या क्रमांकावर रॉबिन उथप्पाचे नाव आहे, ज्याने ७२७२ धावा केल्या आहेत.

संजू सॅमसन सोशल मीडियावर होतोय ट्रोल –

वेस्ट इंडिजविरुद्ध फ्लॉप ठरलेला संजू सॅमसन सोशल मीडियावर ट्रोल होत आहे. त्याच्या संघातील स्थानावर सोशल मीडियावर प्रश्न उपस्थित केले जात आहेत. आयर्लंडविरुद्धच्या टी-२० मालिकेसाठी संजू सॅमसनचीही संघात निवड करण्यात आली आहे, जिथे त्याला स्वतःला सिद्ध करण्याची शेवटची संधी असेल. आयर्लंडविरुद्धच्या टी-२० मालिकेसाठी त्याची यष्टिरक्षक फलंदाज म्हणून निवड झाली आहे.

हेही वाचा – Shahid Afridi : गौतम गंभीरबद्दल शाहिद आफ्रिदीचे मोठं वक्तव्य; म्हणाला, “भारतीय संघात मी त्याच्यासारखा…”

सामन्याबद्दल बोलायचे, तर पाचव्या सामन्यात भारतीय संघाने प्रथम फलंदाजी करताना ९ बाद १६५ धावा केल्या होत्या. ज्यामध्ये सूर्यकुमार यादवने सर्वाधिक धावाचे योगदान दिले होते. सूर्यकुमारने ४७ चेंडूचा सामना करतान ४ चौकार आणि ३ षटकारांच्या मदतीने ६१ धावा केल्या. १६६ धावांचा पाठलाग करताना वेस्ट इंडिजने ब्रँडन किंगच्या नाबाद ८५ धावांच्या जोरावर १८ षटकांत विजयावर शिक्कामोर्तब केला. त्याने ५५ चेंडूत ५ चौकार आणि ६ षटकार लगावले.