T20 World Cup 2022: अफगाणिस्तानने भेदक गोलंदाजी करत यजमान ऑस्ट्रेलियाला १६८ धावांवर रोखले

कांगारूंच्या संघाकडून ग्लेन मॅक्सवेलने नाबाद ५४ धावांची शानदार खेळी केली. मिचेल मार्शने ३० चेंडूत ४५ धावा करत त्याला मोलाची साथ दिली. फलंदाजीला आलेल्या ऑस्ट्रेलियन संघाची सुरुवात खराब झाली. पहिल्या पॉवर प्ले मध्ये ५४ धावा करत ३ गडी गमावले. कर्णधार अ‍ॅरॉन फिंचच्या अनुपस्थितीत कर्णधारपदाची जबाबदारी असलेला डेव्हिड वॉर्नर केवळ २५ धावा करून बाद झाला. त्यानंतर फलंदाजीला आलेला मार्कस स्टॉयनिसही फारशी मोठी खेळी करू शकला नाही. त्याने २१ चेंडूत २५ धावा केल्या.

अफगाण संघाकडून नवीन-उल-हकने सर्वाधिक ३ बळी घेत त्याने ४ षटकात २१ धावा दिल्या. फजल हक फारुकीने ४ षटकात २९ धावा देत २ गडी बाद करत त्याला साथ दिली. ऑस्ट्रेलियासाठी हा सामना अत्यंत महत्त्वाचा असून उपांत्य फेरी गाठण्यासाठी संघाला अफगाणिस्तानला कोणत्याही परिस्थितीत हरवावे लागणार आहे. तसेच चांगल्या नेट रनरेटसाठी अफगाणिस्तान संघाला १०६ धावांच्या आत रोखणे आवश्यक आहे.