करोना रुग्णांना घेऊन जाणारी रुग्णवाहिका चोरांनी पळवून नेल्याची धक्कादायक घटना समोर आली आहे. अहमदनगरमधील संगमनेर तालुक्यातील घारगाव येथे हा प्रकार घडला आहे. चालक नसल्याचं पाहून चोराने रुग्णवाहिका पळवली होती. सुदैवाने रुग्णवाहिका सापडली आणि चोराला पोलिसांच्या ताब्यात देण्यात आलं. घारगाव येथील लक्ष्मी हॉटेलजवळ उभी असलेल्या रुग्णवाहिकेत करोना रुग्ण होते. रुग्णांना उपचारासाठी नेलं जात होतं. रूग्णवाहिकेचा चालक काही वेळासाठी बाहेर गेल्याचं पाहून आरोपी वैभव सुभाष पांडे याने संधी साधली. आरोपीने रुग्णवाहिका घारगाव येथून संगमनेरच्या दिशेला पळवण्याचा प्रयत्न केला. रुग्णवाहिकेचे मालक योगेश महादू गोमटे यांना माहिती मिळताच त्यांनी संगमनेर येथील आपल्या मित्रपरिवाराला हा सगळा प्रकार सांगितली. त्यानंतर सर्वांनीच रुग्णवाहिकेचा शोध घेण्यास सुरुवात केली. रुग्णवाहिका संगमनेरमध्ये असल्याचं समजतात या रुग्णवाहिकेला सर्वांनी घेराव घातला. आरोपी सुभाष पांडे याला संगमनेर पोलिसांच्या ताब्यात देण्यात आलं आहे.
