नाशिकमध्ये पिंपळगावजवळ लष्कराचे सुखोई विमान कोसळल्याची घटना बुधवारी सकाळी घडली. पिंपळगावजवळील शिरवाडी येथे ही घटना घडल्याचे वृत्त असून तांत्रिक बिघाडामुळे हे विमान कोसळल्याची माहिती समोर येत आहे. पिंपळगाव परिसरातील वाव ठुशी परिसरात लष्कराचे सुखोई विमान कोसळले. विमान कोसळण्यापूर्वी वैमानिक आणि सहवैमानिकाने पॅराशूटच्या आधारे उडी मारल्याने ते दोघेही सुखरुप आहेत, अशी माहिती जिल्हाधिकारी राधाकृष्णन बी यांनी दिली. तांत्रिक बिघाडामुळे हे विमान कोसळल्याचा अंदाज आहे. या दुर्घटनेत विमान जळून खाक झाल्याचे समजते.
