अमित शहा उद्या लोणी, कोपरगाव दौऱ्यावर; विविध प्रकल्पांचे उद्घाटन

प्रवरानगर येथील कारखान्याच्या विस्तारीत प्रकल्पाचे लोकार्पण व पूर्णाकृती पुतळ्याचे अनावरण शहा यांच्या हस्ते आणि मुख्यमंत्री देवेंद्र फडणवीस यांच्या अध्यक्षतेखाली होणार असल्याची माहिती कारखान्याचे अध्यक्ष डॉ. सुजय विखे यांनी दिली. या कार्यक्रमास विधान परिषदेचे सभापती राम शिंदे, उपमुख्यमंत्री एकनाथ शिंदे व अजित पवार, केंद्रीय राज्यमंत्री रामदास आठवले, केंद्रीय सहकार राज्यमंत्री मुरलीधर मोहोळ, पर्यावरण तथा पशुसंवर्धन विकास मंत्री पंकजा मुंडे, सहकार मंत्री बाळासाहेब पाटील यांच्यासह अन्य मंत्री तसेच महायुतीचे लोकप्रतिनिधी उपस्थित राहाणार आहेत.

प्रवरानगरला रविवारी दुपारी १२ वा. शहा यांचे आगमन होईल. कारखान्याच्या विस्तारीत प्रकल्पाचे उद्घाटन व त्यानंतर लोणी येथील पूर्णाकृती पुतळ्याचे अनावरण करतील. दुपारी १ वा. लोणी येथील बाजारतळावर शहा यांची सभा होणार आहे. शहा यांच्या स्वागताची जय्यत तयारी प्रवरा परिवाराने सुरू केली असून, पावसाची शक्यता लक्षात घेऊन जर्मन हँगर पद्धतीचा भव्य सभामंडपही उभारला आहे.

लोणीचा कार्यक्रम संपल्यानंतर शहा हेलिकॉप्टरने दुपारी ३ वा. कोपरगावला रवाना होणार आहेत. तेथे सहकारमहर्षी शंकरराव कोल्हे सहकारी साखर कारखान्याने उभारलेल्या देशाच्या सहकार क्षेत्रातील पहिला सीएनजी प्रकल्प आणि पोटॅश प्रकल्पाचे उद्घाटन त्यांच्या हस्ते होणार असल्याची माहिती कारखान्याचे अध्यक्ष विवेक कोल्हे यांनी दिली. उद्घाटनानंतर अमित शहा शेतकरी मेळाव्याला संबोधित करणार आहेत. यावेळी मुख्यमंत्री फडणवीस व अन्य मंत्र्यांसह भाजप प्रदेशाध्यक्ष रवींद्र चव्हाण उपस्थित राहणार असल्याचे कोल्हे यांनी सांगितले.

विखे यांच्या निवासस्थानी भोजन

शहा हे उद्या, शनिवारी रात्रीच शिर्डीत मुक्कामास येणार आहेत. रविवारी सकाळी साईबाबा समाधीचे शहा व इतर मान्यवर दर्शन घेऊन मोटारीने नगर-मनमाड रस्त्याने राहाता, बाभळेश्वर मार्गे प्रवरानगरला येणार आहेत. या मार्गावरील तसेच शिर्डीत असलेले गतिरोधक तातडीने हटविण्यात आले आहेत. लोणीतील रस्त्यांचे दुभाजक रंगविण्यात आले आहेत. दुपारी लोणीतील कार्यक्रम संपल्यानंतर शहा व मुख्यमंत्री, उपमुख्यमंत्री इतर मान्यवर मंत्री राधाकृष्ण विखे यांच्या निवासस्थानी भोजनाचा आस्वाद घेणार आहेत.