“माझा मुलगा पुण्यात भंगारचं काम करायचा, तो मुंबईला…”; बाबा सिद्दीकींची हत्या करणाऱ्या आरोपीच्या आईची प्रतिक्रिया!

याप्रकरणातील फरार आरोपी शिवकुमार हा यूपीच्या बहराइच येथील रहिवासी आहे. त्यांच्या आईने एएनआय या वृत्तसंस्थेशी बोलताना प्रतिक्रिया दिली आहे. “आम्हाला या घटनेबाबत आज सकाळी माहिती मिळाली. माझा मुलगा पुण्यात भंगारचं काम करायचा. त्यासाठीच पुण्याला जातोय असं त्याने सांगितलं होतं. तो मुंबईत काय करत होता, हे आम्हाला माहिती नाही. तो १८-१९ वर्षांचा आहे. गेल्या आठ-नऊ दिवसांत त्याच्याशी काहीही बोलणं झालं नाही, त्यामुळे तो आता कुठं आहे, आम्हाला माहिती नाही, असं त्याच्या आईने सांगितलं.

हेही वाचा – बाबा सिद्दीकींच्या हत्येनंतर देवेंद्र फडणवीस यांची पहिली प्रतिक्रिया, “शरद पवारांना इतक्या गंभीर घटनेनंतरही खुर्ची दिसते…”

याप्रकरणातील अन्य आरोपी गुरमैल सिंग याची आजी फुली देवी यांनीही इंडिया टुडेशी बोलताना यासंदर्भात प्रतिक्रिया दिली. २०१९ मध्ये मध्ये एका हत्येचा आरोपाखाली त्याला अटक करण्यात आली होती. तेव्हापासून तो तुरुंगात होता. तीन महिन्यांपूर्वी तो जामिनावर बाहेर आला, तेव्हा काही मिनिटांसाठी तो घरी आला होता. त्यानंतर तो निघून गेला. तेव्हापासून आमचा त्याच्याशी काहीही संपर्क नाही, असं त्यांनी सांगितलं.

याशिवाय या प्रकरणातील तिसरा आरोपी धर्मराज कश्यप याच्या आईने यासंदर्भात भाष्य केलं. धर्मराज पुण्यात भंगाराचं काम करण्यासाठी गेला होता. आम्हाला एवढंच माहीत आहे. तो मुंबईत कसा पोहोचला याबाबत आम्हाला माहिती नाही. या वर्षी होळीला तो घरी आला होता, त्यानंतर गेला तो आलाच नाही, अशी प्रतिक्रिया त्यांनी दिली.

हेही वाचा – Raj Thackeray : बाबा सिद्दीकी यांच्या हत्येप्रकरणी राज ठाकरेंची पहिली प्रतिक्रिया; म्हणाले, “बाहेरच्या राज्यातून…”

बाबा सिद्दीकींची हत्या नेमकी कशी झाली?

बाबा सिद्दीकी हे वांद्रे येथील खेरवाडी सिग्नलजवळ झिशान सिद्दीकी यांच्या ऑफिसमध्ये चालले होते. त्यावेळी तीन अज्ञात व्यक्तींनी बाबा सिद्दीकींवर गोळीबार केला आणि त्यानंतर हे तिघंही तिथून पसार झाले. यापैकी दोघांना पोलिसांनी अटक केली. मात्र, बाबा सिद्दीकींवर गोळीबार करण्यामागचं कारण काय होतं?याबाबत अद्याप माहिती समोर आलेली नाही.