वाई: सातारा लोकसभा मतदारसंघातील उमेदवारीसाठी खासदार उदयनराजे भोसले मागील दोन दिवसांपासून दिल्लीत आहेत. मात्र अजूनही त्यांची केंद्रीय गृहमंत्री अमित शहा यांच्यासोबत भेट शुक्रवारी सायंकाळ पर्यंत झालेली नाही. याबाबत त्यांचे निकटवर्तीय व सातारा लोकसभेचे संयोजक सुनील काटकर यांनी माहिती दिली. उदयनराजे यांना अमित शाह यांची भेट मिळत नाही, या केवळ अफवा आहेत. आम्हाला मुंबईत ज्यांना भेटायचं होतं त्यांना आम्ही भेटलेलो आहोत. आतापर्यंत भारतीय जनता पक्षाच्या २० मतदारसंघांची यादी जाहीर झालेली आहे. अजून २८ मतदारसंघातील उमेदवारांची यादी जाहीर झालेली नाही. त्यामुळे उरलेल्या २८ जागा या पुढील एक-दोन दिवसांत जाहीर होतील. महायुतीमध्ये तीन घटक पक्ष असल्याने उमेदवारी जाहीर होईपर्यंत वेगवगेळ्या गोष्टी घडणार आहेत. अजून वेगवेगळे अंदाज बांधले जात आहेत, असे सुनील काटकर यांनी म्हटले आहे.
हेही वाचा : “पापी पेट का सवाल…”, केंद्रीय यंत्रणांची बाजू घेत सुप्रिया सुळेंची पंतप्रधान मोदींवर टीका
सुनील काटकर पुढे म्हणाले, उदयनराजे कमळाच्या चिन्हावरच लढतील. त्यांना कोणीही विरोध केलेला नाही. उलट उदयनराजेंची एकमताने सगळ्यांनी शिफारस केली आहे. आमदार, जिल्हाध्यक्ष अन्य पदाधिकारी या सर्वांनी पक्षाला सातारा लोकसभेची जागा मिळाली पाहिजे, अशीच इच्छा व्यक्त केली आहे. दोन दिवसांत ती जाहीर होईल. उदयनराजे यांना अमित शाह यांची भेट मिळत नाही, या सर्व अफवा आहेत. आता आम्हाला मुंबईत ज्यांना भेटायचं होतं त्यांना आम्ही भेटलेलो आहोत. मुंबईमध्ये उदयनराजेंना कोणाला भेटायचं असेल तर त्यांची वेळ मागून जावं लागत नाही. त्यांना कोणत्या वेळेची मर्यादा नसते. योग्य वेळी योग्य सर्व भेटी होतात. थोडं वाट बघणं उचित ठरेल. या सर्व गोष्टींना उद्या दुपारपर्यंत पूर्णविराम मिळेल. छत्रपतींचा गनिमी कावा सर्वांना माहित आहे. त्यांनी कधीही कोणाशी दगाफटका केला नाही. त्यामुळे त्यांनाही कधी दगा फटका होणार नाही असे सुनील काटकर म्हणाले. साताऱ्याच्या जागेवरुन महायुतीत जोरदार रस्सीखेच आहे. भाजपाची उमेदवारी उदयनराजेंनाच मिळणार असा विश्वास कार्यकर्त्यांना आहे.
