“तिरंगा राष्ट्रध्वज नाही, जन-गण राष्ट्रगीत नाही”, संभाजी भिडेंच्या वक्तव्यावर छगन भुजबळांचा संताप; म्हणाले, “बहुजनांच्या पोरांना…”

“भारताच्या स्वातंत्र्यासाठी लाखो तरुणांनी वंदे मातरम म्हणत स्वतःला फासावर लटकवून घेतलं तेव्हा म्हटलेलं वंदे मातरम गीत तुमचं आमचं राष्ट्रगीत नाही. १८९८ साली पंचम जॉर्ज राजाच्या स्वागतासाठी रवींद्रनाथ टागोर यांना ‘जन गण मन’ हे गीत सुचलं” असं वक्तव्य शिवप्रतिष्ठान हिंदुस्थानचे संस्थापक संभाजी भिडे यांनी केलं आहे. ते रविवारी पिंपरी – चिंचवडमध्ये बोलत होते. १५ ऑगस्ट हे हांडगे स्वातंत्र्य असलं तरी पत्करले पाहिजे. सबंध देशावर हिंदवी स्वराज्य येत नाही तोपर्यंत १५ ऑगस्ट हा स्वातंत्र्य दिन दुःखाचाही आहे, त्या दिवशी कडकडीत उपवास करायचा असेही ते म्हणाले. भिडे यांच्या या वक्तव्यामुळे त्यांच्यावर टीका सुरू आहे. राष्ट्रवादी काँग्रेसचे आमदार छगन भुजबळ यांनी भिडे यांना अटक करावी अशी मागणी केली आहे.