Eknath Khadse On Pranjal Khewalkar Rave Party : पुण्यातील खराडीतील एका सोसायटीतील रेव्ह पार्टीवर पुणे पोलिसांनी रविवारी छापा टाकला होता. पोलिसांनी केलेल्या या कारवाईत रोहिणी खडसे यांचे पती प्रांजल खेवलकर यांनाही अटक करण्यात आलेली आहे. प्रांजल खेवलकर यांच्यासह एकूण सात जणांचा यात समावेश असून यातील पाच जणांना दोन दिवसांची पोलीस कोठडी तर दोन महिलांना न्यायालयीन कोठडी मिळाली आहे.
दरम्यान, या संपूर्ण प्रकरणाचा तपास पोलीस करत आहेत. मात्र, या रेव्ह पार्टी प्रकरणाबाबत आमदार एकनाथ खडसे यांनी संशय व्यक्त केला आहे. तसेच पुणे रेव्ह पार्टी प्रकरण संशयास्पद असून आम्हाला बदनाम करण्यासाठी केलेला हा प्रयत्न असल्याचा आरोप एकनाथ खडसे यांनी केला आहे. तसेच या पार्टीतील समावेश असलेल्या दोन महिलांशी प्रांजल खेवलकर यांचा कोणताही संबंध नसून त्या महिलांना त्या ठिकाणी प्लँट करण्यात आल्याचा आरोप एकनाथ खडसे यांनी केला आहे. ते टिव्ही ९ मराठी या वृत्तवाहीनीशी बोलत होते.
एकनाथ खडसे काय म्हणाले?
“या प्रकरणात पाच जणांना दोन दिवसांची पोलीस कोठडी आणि दोन महिलांना न्यायालयीन कोठडी मिळाली आहे. या दोन महिलांपैकी एका महिलेच्या पर्समध्ये कोकेन सदृश्य पदार्थ आढळून आले आहेत. मग तरी देखील त्या महिलेला न्यायालयीन कोठडी कशी मिळाली? पोलिसांनी एफआयआरमध्ये असं म्हटलं की प्रांजल खेवलकर यांच्याकडे कोकेन किंवा गांजा अशा प्रकारचे पदार्थ सापडलेले नाहीत. तसेच आम्ही देखील सांगत आहोत की प्रांजल खेवलकर यांनी कोणतंही ड्रग्स वैगेरे सेवन केलेलं नाही. मग अशा परिस्थितीत पोलिसांनी प्रांजल खेवलकर यांची पोलीस कोठडी कशी मागितली?”, असं एकनाथ खडसे यांनी म्हटलं आहे.
“मला हे सर्व प्रकरण संशयास्पद वाटत आहे. अशा अनेक गोष्टी बाहेर येऊ शकतात, त्यात आश्चर्य वाटण्याचं काही कारण नाही. या प्रकरणात आणखी काही करण्याचा प्रयत्न केला तर आम्ही ही लढाई सर्वोच्च न्यायालयापर्यंत लढवू. पण सध्या जे सुरू आहे ते आम्हाला बदनाम करण्यासाठी सुरू असल्याचं दिसत आहे. आता त्या पार्टीत ज्या दोन महिलांचा समावेश आहे, त्या महिलांना त्या ठिकाणी प्लँट करण्यात आलं होतं”, असा आरोप एकनाथ खडसे यांनी केला आहे.
आता या पार्टीवेळी जेव्हा त्या ठिकाणी आधी तिघे पार्टीसाठी बसले होते, तेव्हा तेथे महिला नव्हत्या. मात्र, त्यानंतर दोन व्यक्ती त्या दोन महिलांना पार्टीसाठी घेऊन आले आणि त्यानंतर काही वेळातच त्या ठिकाणी पोलिसांचा छापा पडला. आता हा योगायोग होऊ शकत नाही. त्यामुळे मी या प्रकरणाबाबत पोलिसांना काही प्रश्न विचारले. पण पोलिसांना त्या प्रश्नांची उत्तरं देता आलेलं नाही. पोलीस आयुक्तांनी उडवाउडवीची उत्तर दिली”, असा आरोप एकनाथ खडसे यांनी केला आहे.
“पाच जणांच्या पार्टीला तुम्ही रेव्ह पार्टी कशावरून म्हणता? या प्रश्नाचं उत्तर पोलीस आयुक्तांनी दिलं नाही. तसेच खासगी फोटो हे बाहेर कसे आले? या प्रश्नावर पोलीस आयुक्तांनी म्हटलं की त्रयस्त व्यक्तीने काढले असलील. मग जेव्हा एखाद्या ठिकाणी पोलीस छापा टाकतात तेव्हा ते क्षेत्र प्रतिबंधित असतं. त्या ठिकाणी कोणालाही प्रवेश दिला जात नाही. मग असं असताना फोटो आणि व्हिडीओ कसे समोर आले? क्षेत्र प्रतिबंधित असताना पोलिसांनी त्रयस्त व्यक्तीला प्रवेश कसा दिला? त्यामुळे या प्रकरणात संशयाला जागा आहे. प्लँट केल्याशिवाय त्या महिला त्या ठिकाणी येऊ शकत नाहीत. पण आम्हाला बदनाम करण्याचा प्रयत्न करण्याचं जर ठरवलंच असेल तर उद्या अचानक आणखी काही नावे समोर येऊ शकतात”, असंही एकनाथ खडसे यांनी म्हटलं आहे.
