पोट दुखणाऱ्या ‘त्या’ राजकीय विरोधकांसाठी मोफत दवाखाना, एकनाथ शिंदेंचा विरोधकांना टोला

एकनाथ शिंदे म्हणाले, विरोधकांकडे सध्या मुद्दाच नाही. नुकसान झालेल्या शेतकऱ्यांकडे ३२ हजार कोटी रुपयांचे पॅकेज करेन, याची त्यांनी कल्पना केली नव्हती. मी दसरा मेळाव्यात शेतकऱ्यांची दिवाळी काळी होऊ देणार नाही, अशी ग्वाही दिली होती. त्यानुसार शेतकऱ्यांच्या खात्यात पैसे जाऊ लागले. त्यामुळे मुद्दा नसल्यामुळे ते दिशाभूल करत आहेत. जर चांगला निर्णय घेतला तर त्याला चांगले म्हटले पाहिजे. हेच लोक मुख्यमंत्री देवेंद्र फडणवीस यांना पुष्पगुच्छ देऊन चांगले मुख्यमंत्री आहेत, असे म्हणत होते. आता मात्र मुख्यमंत्री कसे अपयशी आहेत, हे सांगत सुटले आहेत. ही त्यांची दुटप्पी भूमिका आहे. हे त्यांचे कायमचे रडगाणे आहे, असा टोलाही उपमुख्यमंत्री शिंदे यांनी लगावला.

सफरचंदाची शेतीही शक्य

सफरचंदाची शेती आपल्या भागात होवू शकते. येथील हवामान, पाणी, माती त्याला पोषक आहे. या भागातील लोकांना नावीन्यपूर्ण शेती करता येईल, गटशेतीच्या माध्यमातून एकत्र आणता येईल. याठिकाणी जांभूळ, आवळा, फणस आंबा, काजू अशी सर्व प्रकारचे फळे येतात. कॉफी, केशर, चहा, हळदही पिकवली जावू शकते. स्ट्रॉबेरीलाही पोषक हवामान आहे.

प्रयोगांमुळे कृषी पर्यटन वाढेल…

इथला माणूस नोकरीसाठी मुंबई-ठाण्यात जातो. त्याला गाव सोडावा लागू नये, यासाठी शेतीत नवनवीन प्रयोग केल्यास कृषी पर्यटनहीं वाढू लागेल. मुनावळे येथे पर्यटन प्रकल्प सुरू होत आहे. कोयनेच्या शिवसागर जलाशयात पाण्यातील खेळ (वॉटर स्पोर्ट) होत आहे. कोकण सातारा जोडणारा पूल तयार होत आहे. पुढच्या महिन्यात कोयना पाणलोट उत्सव (बॅक वॉटरला फेस्टिव्हल) घेण्याचेही नियोजन असल्याचे एकनाथ शिंदे यांनी सांगितले.