पोलिसांच्या स्पर्धेत सातारा जिल्ह्यास सर्वसाधारण विजेतेपदाचा मान; सूर्या फिरता चषक साताऱ्याच्या ‘सूचक’ श्वानास

सातारा शहरामध्ये विसाव्या कोल्हापूर परिक्षेत्रीय पोलीस कर्तव्य २०२५ मेळाव्याचे तीन दिवस आयोजन करण्यात आले होते. या मेळाव्यामध्ये पोलीस अधिकारी अमलदार यांची व्यावसायिक कौशल्य चाचणी तपास, कौशल्य फोटोग्राफी, व्हिडिओग्राफी घातपात विरोधी, तपासणी श्वान स्पर्धा, संगणक वापर अशा कौशल्य स्पर्धा घेण्यात आल्या होत्या. या स्पर्धेमध्ये पाच जिल्ह्याचे १३० स्पर्धक सहभागी झाले होते. या स्पर्धेमध्ये सातारा जिल्ह्याने पाच स्पर्धांमधून यश संपादन करून १७ सुवर्ण, तीन रौप्य, सहा कास्य पदके प्राप्त करून सर्वसाधारण विजेतेपद पटकावले आहे. तर उपविजेतेपद पुणे ग्रामीण पोलीस संघाने पटकावले. कोल्हापूर परिक्षेत्रीय कर्तव्य मेळाव्यामध्ये प्रथमच सुरू करण्यात आलेला फिरता चषक सातारा जिल्ह्याच्या नार्कोटिक्स शोधक विभागाच्या ‘सूचक’ श्वानाला मिळाला आहे.

या कार्यक्रमासाठी कोल्हापूर पोलीस अधीक्षक योगेश कुमार, सांगली पोलीस अधीक्षक संदीप घुगे, सोलापूर ग्रामीणचे पोलीस अधीक्षक अतुल कुलकर्णी, पुणे ग्रामीणचे पोलीस अधीक्षक संदीप गिल, साताऱ्याच्या अपर पोलीस अधीक्षक वैशाली कडूकर, सातारा गृह उपाधीक्षक अतुल सबनीस उपस्थित होते. पोलीस अधीक्षक तुषार जोशी यांनी कार्यक्रमाचे प्रास्ताविक केले. सातारा जिल्हा पोलीस दलाच्या वतीने सर्व मान्यवरांचे स्वागत करण्यात आले. विजेत्या संघाला सुनील फुलारी महानिरीक्षक कोल्हापूर परिक्षेत्र यांच्या हस्ते करंडक प्रदान करण्यात आला. त्यावेळी सातारा जिल्हा पोलिसांच्या संघाने एकच जल्लोष केला. ६ ते ८ ऑगस्ट या दरम्यान या स्पर्धा पोलीस मुख्यालय, सातारा पोलीस परेड ग्राउंड व यशवंतराव चव्हाण महाविद्यालय सातारा या ठिकाणी घेण्यात आल्या.