बीड : जिल्ह्यात लावण्यात येणाऱ्या फलकावर अनधिकृ मजकूर,गुन्हेगारांचे फोटो छापण्याबाबत बीडचे जिल्हाधिकारी विवेक जॉन्सन यांनी आदेश जारी केले होते. हा आदेश १० ऑगस्ट रोजी जारी करण्यात आला होता. मात्र, जिल्हाधिकाऱ्यांच्या या आदेशाचे परळीत उल्लंघन झाल्याचे दिसून येत आहे.
सरपंच संतोष देशमुख हत्याप्रकरणातील मुख्य आरोपी असलेला वाल्मीक कराड याचा फोटो ईद-ए-मिलादच्या शुभेच्छा फलकावर तसेच स्वागत कमानीवर झळकल्याचे दिसून आले आहे.या फलकावर धनंजय मुंडे यांचा देखील फोटो दिसून येत आहे.या फलकावर शुभेच्छुक म्हणून राष्ट्रवादी काँग्रेस युवक नेते असा उल्लेख देखील करण्यात आला आहे.
विशेष म्हणजे हा फलक शहर व संभाजी नगर पोलीस ठाण्याच्या समोरच्या भागातच लावण्यात आले असून येथूनच हाकेच्या अंतरावर नगरपरिषद देखील आहे.आता यावर जिल्हाधिकारी प्रशासन काय कारवाई करते हे पाहणे महत्त्वाचे असणार आहे. जिल्हाधिकाऱ्यांनी काढलेल्या फलका संदर्भातील आदेश जिल्ह्यातील उपविभागीय अधिकारी, तहसीलदार, पंचायत समितीचे गटविकास अधिकारी, सर्व परिषदेचे मुख्याधिकारी यांना देण्यात आले होते.
जिल्हाधिकाऱ्यांनी काढलेल्या आदेशात काय म्हटले ?
जिल्हाधिकाऱ्यांनी १० ऑगस्ट रोजी काढलेल्या आदेशात सामाजिक सलोखा आणि कायदा सुव्यवस्था राखण्यासाठी बॅनर लावण्यापूर्वी मजकूर फोटोची पडताळणी करणं आता आवश्यक असल्याचे तसेच याचबरोबर अनाधिकृत फलकांवर तात्काळ कारवाई करावी तसेच फलकावरील मजकूर आक्षेपार्ह नसावा,गुन्हेगार व गुन्हेगारीचे उदात्तीकरण करणारे व गुन्हेगारांचे फोटो नसावेत याची दक्षता घेणे गरजेचे असल्याचे आदेशात म्हटले होते.
