सातारा : सातारा जिल्ह्यात आगामी गणेशोत्सवात तीव्र प्रकाश यंत्रणेवर(लेझर लाईट) पूर्णपणे बंदी घालावी, असे आदेश पालकमंत्री शंभूराज देसाई यांनी दिले आहेत. या लेझर लाईटमुळे अनेकांच्या डोळ्यांना गंभीर इजा होत असल्याचे अनेकदा दिसून आले असल्याने यावर बंदी घालावी, असे देसाई यांनी या वेळी सांगितले. याचा वापर करणाऱ्यांवर कारवाई करण्याचे आदेशही त्यांनी या वेळी दिले.
गणेशोत्सव २०२५ च्या तयारीचा आढावा पालकमंत्री श्री. देसाई यांनी घेतला. या बैठकीला जिल्हाधिकारी संतोष पाटील, मुख्य कार्यकारी अधिकारी याशनी नागराजन, पोलीस अधीक्षक तुषार दोशी, उपवनसंरक्षक अमोल सातपुते, निवासी उपजिल्हाधिकारी नागेश पाटील यांच्यासह सर्व तहसीलदार, नगर पालिकांचे मुख्याधिकारी उपस्थित होते.
सातारा जिल्ह्यात आगामी गणेशोत्सवात तीव्र प्रकाश यंत्रणेवर(लेझर लाईट) पूर्णपणे बंदी घालावी, असे सांगून पालकमंत्री श्री. देसाई म्हणाले, या ‘लेझर लाईट’मुळे डोळ्यांना गंभीर इजा होण्याच्या अनेक घटना घडल्या आहेत. या आदेशानंतरही तीव्र प्रकाश यंत्रणेचा (लेझर लाईट) वापर करणाऱ्या कुठल्याही सार्वजनिक गणेश मंडळावर कडक कारवाई करावी.
दरम्यान, ध्वनी प्रदूषणाच्या अनुषंगाने सर्वोच्च न्यायालयाने मर्यादा घालून दिलेल्या आहेत. या मर्यादेचे आवाजाच्या भिंती (डॉल्बी )चालकांनी गणेशोत्सव कालावधीत तंतोतंत पालन करावे. जे डॉल्बीचालक ध्वनी मर्यादेचे पालन करणार नाहीत, अशांवर कारवाई करण्याच्या सूचनाही देसाई यांनी दिल्या. गौरी विसर्जनानंतर महिला मोठ्या प्रमाणात गणपती पाहण्यासाठी बाहेर पडतात. छेडछाड किंवा कोणताही अनुचित प्रकार घडू नये, यासाठी पोलिसांनी पेट्रोलिंगचे प्रमाण वाढवावे.
विसर्जन मिरवणुकीच्या वेळी कोणत्याही प्रकारचा तंटा निर्माण होणार नाही यासाठी आवश्यक खबरदारी घ्यावी. गणेशोत्सव काळात नागरिकांना त्रास होणार नाही, याची काळजी घ्यावी. प्रशासनाने गणेश उत्सवाचे चांगले नियोजन केले असून यंदाचा गणेशोत्सव सुखात, आनंदात व उत्साहात पार पाडूया, असेही आवाहन पालकमंत्री श्री. देसाई यांनी केले.
