दापोली – महायुती सरकार राज्यभरात विरोधी पक्षांतील नेत्यांना आपल्याकडे वळवत असल्याचे पाहायला मिळत आहे. कोकणात नुकताच शरद पवार गटातील नेते वाशिष्टी डेअरीचे मालक प्रशांत यादव यांच्या रुपाने भाजपने आपला डाव टाकत आपल्याकडे वळविल्याचे पहायला मिळाले.
भाजपचे प्रदेशाध्यक्ष रवींद्र चव्हाण राज्याचे मत्स्य बंदर मंत्री नितेश राणे गुहागर तालुक्याचे माजी आमदार विनायक नातू यांच्या समवेत भाजपच्या मुंबई येथील प्रदेश कार्यालयात नुकताच त्यांचा प्रवेशाचा कार्यक्रम पार पडला. ऐन गणपती मध्ये पुन्हा एकदा राजकीय शिमगा होणार आहे. आता कोकणात मनसेचे नेते राज्य सरचिटणीस वैभव खेडेकर हे भाजपच्या वाटेवर असल्याचे बोलले जात आहे. यामुळे कोकणात मनसेला हादरा बसण्याची शक्यता आहे. भाजपाच्या पक्षप्रवेशांसाठी बड्या नेत्यांच्या संपर्कात असल्याचेही समोर आले आहे.
वैभव खेडेकर हे गेल्या काही दिवसांपासून नाराज असल्याची चर्चा आहे. याच दरम्यान त्यांना शिवसेनेत पक्षप्रवेशाची ऑफरही शिवसेना नेते रामदास कदम यांच्या उपस्थितीत पालकमंत्री उदय सामंत यांनी दिली होती. त्यानंतर खेडेकर यांच्या शिवसेना प्रवेशाच्या चर्चा रंगल्या होत्या. पण आता त्यांना भाजपकडून पक्षप्रवेशाची ऑफर देण्यात आल्याची माहिती आहे. यासाठी खेडेकर यांच्या भाजपच्या नेत्यांजवळ भेटीगाठी बैठकही झाल्याचं बोललं जातं. त्यांच्या पक्ष प्रवेशासाठी थेट प्रदेशाध्यक्ष रवींद्र चव्हाण व मंत्री भाजपाचे जिल्हा संपर्क मंत्री नितेश राणे यांनी लक्ष घातल्याची माहिती आहे. त्यामुळे असं झाल्यास स्थानिक स्वराज्य संस्थांच्या निवडणुकीच्या पार्श्वभूमीवरच कोकणात मनसेला मोठा धक्का बसणार आहे.
वैभव खेडकर यांचे खेड नगर परिषदेवर वर्चस्व आहे. आता स्थानिक स्वराज्य संस्थांच्या निवडणुका काही दिवसांवर आल्या असतानाच शिवसेना शिंदे गटाचे नेते रामदास कदम व राज्याचे गृहराज्यमंत्री योगेश कदम यांना शह देण्यासाठी भाजप वैभव खेडेकरांचा प्रवेश करुन घेत आहे की काय असा प्रश्न सर्वसामान्य माणसांना पडला आहे. दापोली खेड मंडणगड विधानसभा मतदार संघात शिवसेना शिंदे गटाचे आणि भाजपचे फारसे सख्य नसल्याचे येथील जनतेला सर्वश्रुत आहे. आता वैभव खेडेकरांच्या रुपाने भाजप दापोली-खेड-मंडणगड विधानसभेवर आपली ताकद आजमवण्याचे काम करील यात शंका नाही. राज ठाकरे यांचे कोकणातील शिलेदार मनसेचे कोकण संघटक वैभव खेडेकर यांचा लवकरच भाजपा प्रवेश होईल अशा चर्चा सध्या खुलेआमपणे या मतदारसंघात सुरू आहेत. वैभव खेडेकर यांच्या भाजपा प्रवेशाचा मुहूर्तही ठरल्याची चर्चा आहे.
कोण आहेत वैभव खेडेकर?
वैभव खेडेकर हे राज ठाकरे यांचे कोकणातील महत्त्वाचे शिलेदार आहेत. त्यांनी २०२४ साली दापोली मतदारसंघातून विधानसभा निवडणूक लढवली होती मात्र त्यात त्यांचा पराभव झाला होता. राज ठाकरे यांनी मनसे स्थापन केल्यापासून ते त्यांच्याबरोबर आहेत इतकच नाही तर राज्यातील पहिली खेड नगरपरिषद निवडून आणण्यात वैभव खेडेकर यांचा पुढाकार होता. ते खेडचे यापूर्वी नगराध्यक्ष राहिले आहेत. धडाडीचा आंदोलनातील थेट भिडणारा कार्यकर्ता अशी त्यांची खास ओळख आहे. यापूर्वी त्यांचा संघर्ष हा थेट त्यांचे राजकीय गुरू शिवसेना नेते रामदास कदम यांच्याबरोबर राहिला आहे पण अलीकडे हा संघर्ष निवळला आहे. युवा वर्गामध्येही वैभव खेडेकर यांची मोठी क्रेझ आहे.
वैभव खेडेकर यांच्यावर आता सद्यस्थितीत मनसेच्या राज्यसरचिटणीस कोकण संघटकपदाची मोठी जबाबदारी आहे. त्यामुळे वैभव खेडेकर यांच्या भाजपा पक्षप्रवेश विषयाची चर्चा सध्या सुरू झाली आहे असं झाल्यास मनसेला मोठा धक्का कोकणात रत्नागिरी जिल्ह्यात बसण्याची शक्यता आहे. मात्र वैभव खेडेकर यांच्या खेड येथील बालेकिल्लातच त्यांच्या भाजपा प्रवेशाची खुलेआम चर्चा सुरू आहे. इतकंच नाही तर त्यांचेच निकटवर्तीय कार्यकर्ते खाजगीत हा प्रवेश जवळपास निश्चित झाल्याचं सांगत असून गणेशोत्सवानंतर हा प्रवेश होईल असे बोलले जात आहे.
सध्या असा कोणताही विषय नाही जर काही असं असेल तर मी पत्रकार परिषद घेऊन जाहीर करेन. – वैभव खेडेकर, मनसे सरचिटणीस
