सातारा: कोकणात जाणाऱ्या गणेशभक्तांना टोलमाफी देण्याचा निर्णय महायुती सरकारने घेतला असल्याची माहिती सार्वजनिक बांधकाम मंत्री शिवेंद्रसिंहराजे भोसले यांनी दिली.
२३ ऑगस्ट ते ८ सप्टेंबर या कालावधीत मुंबई-गोवा महामार्गावरून कोकणात जाणाऱ्या, तसेच पश्चिम महाराष्ट्रातून जाणाऱ्या मुंबई-बंगळुरू महामार्गावर टोलमाफी देण्यात आली आहे. या निर्णयाबद्दल शिवेंद्रसिंहराजे यांनी मुख्यमंत्री देवेंद्र फडणवीस, उपमुख्यमंत्री एकनाथ शिंदे, अजित पवार यांचे आभार मानले आहेत.
मुंबई-बंगळुरू राष्ट्रीय महामार्ग, मुंबई-गोवा राष्ट्रीय महामार्ग, सार्वजनिक बांधकाम विभाग व महाराष्ट्र राज्य रस्ते विकास महामंडळाच्या अखत्यारितील सर्व महामार्गांवरील टोलनाक्यांवर ही टोलमाफी लागू राहणार आहे. एसटीसह खासगी वाहनांना या निर्णयाचा लाभ होणार आहे. शासनाने या योजनेसाठी खास ‘गणेशोत्सव २०२५’ व ‘कोकण दर्शन’ अशा आशयाचे स्टिकर स्वरूपाचे पास, त्यावर गाडी क्रमांक, चालकाचे नाव असा मजकूर नमूद करून ते आवश्यक त्या संख्येनुसार संबंधित परिवहन विभाग, वाहतूक पोलीस, आरटीओ यांनी समन्वय साधून पोलीस स्टेशन, वाहतूक पोलीस चौकी व संबंधित आरटीओ ऑफिसमध्ये उपलब्ध करून देण्यात येणार आहेत. तसेच हे पास परतीच्या प्रवासासाठी ग्राह्य धरण्यात येणार आहेत.
महाराष्ट्र राज्य मार्ग परिवहन महामंडळाच्या बस व इतर वाहने महाराष्ट्रातील ज्या जिल्ह्यातून येणार आहेत, तेथील पोलीस खाते किंवा प्रादेशिक परिवहन खाते यांच्याकडील पास उपलब्ध करून देण्यात येणार आहेत. संबंधित जिल्ह्यातून गौरी-गणपती उत्सवात सर्व बसना पथकर माफी असलेले पास लावून रवाना कराव्या लागणार आहेत. ग्रामीण व शहरी पोलीस व आरटीओ कार्यालयामार्फत दिल्या जाणाऱ्या पासची माहिती सार्वजनिक बांधकाम विभागाला सादर करावी लागणार आहे. पोलीस व परिवहन विभागाने गणेशोत्सवाच्या काळात पास सुविधा आणि त्यांच्या उपलब्धतेबाबतची माहिती जनतेला होण्यासाठी आवश्यकतेनुसार त्याची प्रसिद्धी करायची आहे. शासनाने दिलेली ही टोलमाफी भाविकांसाठी मोठा दिलासा ठरणार आहे. दरम्यान, शासनाच्या या निर्णयामुळे प्रवास खर्चात व वेळेत बचत होईल आणि बाप्पांच्या दर्शनाचा आनंद अधिक द्विगुणित होईल, अशा प्रतिक्रिया भाविकांकडून व्यक्त होत आहेत.
पास कसा मिळवायचा?
राज्य शासनाने या योजनेसाठी खास ‘गणेशोत्सव २०२५’ व ‘कोकण दर्शन’ असे नाव असलेले पास तयार केले आहेत. पासवर वाहन क्रमांक, वाहनमालकाचे नाव आणि प्रवासाची तारीख नमूद असेल. जाणे व परतीचा प्रवास या दोन्हीसाठी हे पास ग्राह्य राहतील. हे पास संबंधित वाहतूक पोलीस ठाणे, आरटीओ आणि स्थानिक पोलीस ठाण्यांमधून उपलब्ध करून दिले जाणार आहेत.
