सावंतवाडी : कोकणच्या नयनरम्य निसर्गाचा अनुभव घेत, डोंगर-घाट आणि समुद्रकिनाऱ्यावरून चालण्याचा एक अनोखा आणि आव्हानात्मक उपक्रम ‘कोकण ट्रेल २०२५’ प्रथमच आयोजित करण्यात आला आहे. ग्रीन ट्रेल फाऊंडेशनतर्फे आयोजित करण्यात आलेला हा ‘वॉकाथॉन’ २८ नोव्हेंबर रोजी सकाळी ६ वा. सावंतवाडी येथील जिमखाना मैदानावरून सुरू होईल आणि ३० नोव्हेंबरला येथेच समारोप होईल. संस्थेचे अध्यक्ष सचिन बिर्जे यांनी या उपक्रमाची माहिती देताना सांगितले की, या स्पर्धेत देश-विदेशातील अनेक लोक सहभागी होतील आणि सिंधुदुर्ग जिल्ह्यातील नागरिकांनीही यात मोठ्या संख्येने सहभागी व्हावे, असे आवाहन त्यांनी केले. स्पर्धेचे स्वरूप: ‘कोकण ट्रेल २०२५’ मध्ये दोन प्रमुख प्रकार आहेत:मुख्य ट्रेल: १०० किमी अंतर, जे सलग ५० तासांत पूर्ण करायचे आहे.
लघु ट्रेल: ५० किमी अंतर, जे २५ तासांत पूर्ण करायचे आहे. या ट्रेलमध्ये व्यक्तिगत सहभाग नसून, २, ३ अथवा ४ सदस्यांच्या टीम स्वरूपात सहभाग घेणे अनिवार्य आहे. सर्व इच्छुकांना ऑनलाईन नोंदणी करणे आवश्यक आहे. हा ट्रेल कोकणच्या हिरवाईतून, डोंगर-घाट, समुद्रकिनारा, गाववाडी, नदीकाठ व जंगलातून जातो. सावंतवाडी, वेंगुर्ला तालुक्यातून पुन्हा सावंतवाडी येथे समारोप होईल. सहभागी टीमला त्यांच्या मर्यादा ओलांडण्याची, कठीण ध्येय गाठण्याची आणि कोकणातील निसर्ग, संस्कृती व लोकजीवन अनुभवण्याची ही एक उत्तम संधी आहे.
आयोजकांनी ट्रेल मार्गावर सहभागींच्या सोयीसाठी उत्तम व्यवस्था केली आहे. प्रत्येक १० किमीवर चेकपॉईंट ठेवलेले आहेत, जिथे वैद्यकीय मदत, पाणी, अन्न व सुरक्षेची संपूर्ण व्यवस्था करण्यात आली आहे. यात सहभागी होणाऱ्या टीमसाठी प्रवेश फी ठेवण्यात आली आहे. ग्रीन ट्रेल फाऊंडेशनने हा उपक्रम स्थानिक प्रशासन, स्वयंसेवी संस्था, महाविद्यालये व विविध संघटनांच्या सहकार्याने आयोजित केला आहे, ज्यामुळे पर्यटनवृद्धी साधली जाईल. यामध्ये स्थानिक खेळाडू, माध्यम प्रतिनिधी, व्यावसायिक यांचाही सहभाग असेल. यावेळी संस्थेचे अध्यक्ष सचिन बिर्जे, सदस्य केदार लेले आणि प्रशांत सावंत आदींनी हि माहिती दिली.अधिक माहितीसाठी इच्छुक ९३२५५९६९८६ या क्रमांकावर संपर्क साधू शकतात.
